මුල් යෝජනාවේ සහ ආයෝජනයේ ප්‍රමාණයට වඩා හම්බන්තොට නව පිරිපහදුවේ ධාරිතාව දෙගුණ කිරීමට Sinopec සමාගම තීරණය කර ඇති බව බලශක්ති ඇමැති කංචන විජේසේකර පැවසීය.

Sinopec Overseas Investment Holding Pvt Ltd හි නිලධාරීන් මේ බව ප්‍රකාශ කර ඇත්තේ විදුලිබල හා බලශක්ති අමාත්‍යංශයට ඊයේ පැමිණි අවස්ථාවේදීය.

“Sinopec හි කළමනාකාරිත්වය මුල් යෝජනාව සහ ආයෝජනය අනුව පිරිපහදු කිරීමේ ධාරිතාව දෙගුණ කිරීමට තීරණය කර ඇති බව නිලධාරීන් පෙන්වා දුන්නා . ඔවුන් ව්‍යාපෘතිය සඳහා ගිවිසුම් අත්සන් කර 2024 ජූනි වන විට වැඩ ආරම්භ කිරීමට අදහස් කර සිටිනවා, ” යනුවෙන් X සමාජ මාධ්‍ය වේදිකාවේ ඇමැති විජේසේකර සටහන් කර තිබිණි.

හම්බන්තොට යෝජිත නව පිරිපහදුව ඉදිකිරීම සඳහා පාර්ශ්වකරුවන් සමඟ පැවති සාකච්ඡා වල ප්‍රගතිය පිළිබඳ Sinopec සමාගමේ උප සභාපති ප්‍රමුඛ නිලධාරීන් මෙම සාකච්ඡාවේ දී දැනුවත් කරන ලදී.

ජල සම්පාදනය, විදුලිය සැපයීම, ඉඩම් ලබාදීම සහ ආයෝජන මණ්ඩල පහසුකම් සම්බන්ධයෙන් අදාළ බලධාරීන් සමඟ සාකච්ඡා පැවැත්වෙන බව ද ඇමැතිවරයා සඳහන් කළේය.