ශ්‍රී ලංකාව බලා යාත්‍රා කරමින් සිටි විශාල භාණ්ඩ ප්‍රවාහන නෞකාවක් බැල්ටිමෝර් හි පාලමක ගැටී කඩා වැටීමේ සිද්ධියෙන් අවම වශයෙන් පුද්ගලයන් හය දෙනෙකු මියහෝස් ඇති බවට අනුමාන කර තිබේ.

බැල්ටිමෝර් හි ෆ්‍රැන්සිස් ස්කොට් කී පාලමේ වළවල් සකසමින් සිටි කම්කරුවන් අට දෙනෙකු අනතුරත් සමග ඊට පහළින් ඇති පැටප්ස්කෝ ගඟට වැටී තිබිණි.

පසුව ඒ අතරින් දෙදෙනෙකු බේරාගත් බව බලධාරීහු ප්‍රකාශ කළහ.

සේවකයන් සේවය කළ සමාගමේ ජ්‍යෙෂ්ඨ විධායක නිලධාරියෙක් ඊයේ දහවල් පැවසුවේ අතුරුදහන් වූවන් මිය ගිය බවට අනුමාන කරන බවයි.

වෙරළාරක්ෂක බලකාය පැවසුවේ පාලම කඩා වැටීමෙන් පසු අතුරුදන් වූ හය දෙනා වෙනුවෙන් ක්‍රියාත්මක සෝදිසි කිරීම් සහ ගලවා ගැනීමේ කටයුතු අඟහරුවාදා රාත්‍රී 7.30 වන විට අත්හිටුවන බවයි.

එම මෙහෙයුම් බදාදා නැවත ආරම්භ කිරීමට සැලසුම් කර ඇති බව බලධාරීන් ප්‍රකාශ කර ඇත.

මෙම සිද්ධියෙන් පසු මේරිලන්ඩ් ආණ්ඩුකාර වෙස් මුවර් හදිසි තත්ත්වයක් ප්‍රකාශයට පත් කිරීමට පියවර ගෙන තිබිණි.

ත්‍රස්තවාදී ප්‍රහාරයක් පිළිබඳ විශ්වාස කළ හැකි සාක්ෂි කිසිවක් නොමැති බව සඳහන් කරමින්, අනතුර හදිසි අනතුරක් ලෙස පෙනෙන බව ද ඔහු පැවසීය.