සමගි ජන බලවේගය කාන්තා අංශයේ ජාතික සංවිධායක හිරුණිකා ප්‍රේමචන්ද්‍ර ඇතුළු 14 දෙනෙකුට ටොරින්ටන් චතුරශ්‍රයේ වීදි නාට්‍යයකට සහභාගී වීම සම්බන්ධයෙන් නීතිපතිවරයාගේ මතය විමසන ලෙස කුරුඳුවත්ත පොලිසිය කළ ඉල්ලීම කොළඹ ප්‍රධාන මහේස්ත්‍රාත්වරයා අද ප්‍රතික්ෂේප කර තිබේ.

විත්තිකරුවන් 13 දෙනා වෙනුවෙන් පෙනීසිටි ජ්‍යෙෂ්ඨ නීතිඥ අතුල එස්.රණගල ප්‍රකාශ කළේ පොලිසිය නිල නොවන රාජකාරියක් කරමින් සිටියදී සැකකරුවන් පොලිසියට රාජකාරියට බාධාකළ බවට අධිකරණයට පැමිණ අසත්‍ය චෝදනා ඉදිරිපත් කර ඇති බවයි.

පවතින තත්ත්වය හේතුවෙන් අද ශ්‍රී ලංකාවේ කාන්තාවන් මුහුණදෙන දුෂ්කරතා පිළිබඳ සැකකරුවන් වීදි නාට්‍යයක් වේදිකාගත කර ඇති බව නීතිඥවරයා අවධාරණය කළේය.

පොලිසිය තමන්ට පැවරුණු රාජකාරී කටයුත්තක් කළේ නම් තමන්, පැමිණිල්ලට අභියෝග නොකරන බවත් එහෙත් දේශපාලනයේ නිල නොවන සදාචාර විරෝධී වැඩක් කරමින් පොලිසිය උසාවියට පැමිණ වීදි නාට්‍යය ප්‍රදර්ශනය කළ බවට සැකකරුවන්ට චෝදනා කරන බවද නීතීඥවරයා පැවසීය.

අවාසනාවන්ත ලෙස අවනීතිය රජ වන බවත් ආණ්ඩුක්‍රම ව්‍යවස්ථාවේ විධිවිධාන පවා ක්‍රියාත්මක නොවන බවත් නීතිඥවරයා අවධාරණය කළේය.

කුරුඳුවත්ත පොලිසිය අධිකරණයට වාර්තාවක් ගොනුකළ අතර නඩුව සම්බන්ධයෙන් නීතිපතිවරයාගේ මතය විමසීමට මහේස්ත්‍රාත්වරයාගේ අවසරය ඉල්ලා සිටියේය.

මහේස්ත්‍රාත් ප්‍රසන්න ද අල්විස් ඒ සම්බන්ධ නියෝගයක් ලබාදීම ප්‍රතික්ෂේප කළ අතර දණ්ඩ නීති සංග්‍රහයේ 103 වගන්තිය යටතේ පියවර ගන්නා ලෙස කුරුඳුවත්ත පොලිසියට නියෝග කර නඩුව 2024 ඔක්තෝබර් 6 වැනි දිනට කල්තැබීය.

නඩුවට නොපැමිණි 5 වැනි සැකකරු අත්අඩංගුවට ගැනීමට මහේස්ත්‍රාත්වරයා වරෙන්තු නිකුත් කළේය.

කුරුඳුවත්ත පොලිසිය චෝදනා කළේ, සැකකරුවන් විසින් පෙර අවසරයකින් තොරව පෙරහැරක් සංවිධානය කර නීතිවිරෝධී රැස්වීමක සාමාජිකයන්ව සිටියදී පොලිස් නිලධාරීන්ගේ රාජකාරියට බාධාකළ බවටයි.

හිටපු පාර්ලිමේන්තු මන්ත්‍රීනී හිරුණිකා ප්‍රේමචන්ද්‍ර ඇතුළු 14 දෙනෙකු පොලිස් රාජකාරියට මැදිහත්වීම සම්බන්ධයෙන් අත්අඩංගුවට ගෙන තිබිණි.