මහ බැංකුවේ නව නියෝග නොතකා ලීසිං සමාගම් කිහිපයක් විසින් වාහන නැවත අත්පත්කර ගැනීමේ දැවැන්ත මෙහෙයුමක් ක්‍රියාත්මක කර තිබෙන බව වාර්තා වේ.

“ලීසිං සමාගම් මිනිසුන්ගේ බඩු බාහිරාදිය සහ වාහන සන්තකයේ තබා ගැනීමට ඔවුන්ගේ බලය අනිසි ලෙස භාවිත කරනවා. ශ්‍රී ලංකා මහ බැංකුව විසින් ලබා දී ඇති ණය සහන කාලය ලීසිං සමාගම් නොතකා හැරීම ගැන රජය තවමත් නිහඬව සිටිනවා,” යැයි ලීසිං සහ ණය වාරික ගෙවන්නන්ගේ සංගමයේ සභාපති අසංක රුවන් පොතුපිටිය පැවසීය.

ශ්‍රී ලංකා මහ බැංකුව විසින් මූල්‍ය ලීසිං සමාගම් නියාමනය කරනු ලබයි.

අසංක රුවන් පොතුපිටියට අනුව බලපත්‍ර රහිත මූල්‍ය හා ලීසිං ආයතන 1000ක් පමණ පවතී.

2000 අංක 56 දරන කල්බදු මූල්‍ය පනතේ 27 වැනි වගන්තිය යටතේ ගෙවීම් සඳහා දින අනූවකට වඩා කල් ඉකුත් වී ඇති බවට උපදෙස් දෙන ලිපියක් වාහන හිමිකරුට ලබාදිය යුතු බව ඔහු පැවසීය.

කොන්ත්‍රාත්තුව අවසන් කිරීම පිළිබඳ වාහන හිමිකරුට දන්වන දෙවැනි ලිපියක් පළමු ලිපියෙන් දින හතකට පසුව යවනු ලැබේ.

මෙම ක්‍රියා පටිපාටිවලින් පසුව, ලීසිං සමාගමක් පොලිස් ස්ථානයකට පැමිණිල්ලක් ඉදිරිපත් කළ යුතුය.

“කිසිදු පාරිභෝගිකයකු බිය ගැන්වීමෙන් හෝ ශාරීරිකව අපයෝජනය කිරීමෙන් වාහන නැවත ලබා ගැනීමට ඔවුන්ට අයිතියක් නැහැ,” යනුවෙන් අසංක රුවන් පොතුපිටිය පැවසීය.

පොලිසියේ සහය ඇතිව නීතිවිරෝධී අත්අඩංගුවට ගැනීම් සිදුවන බව මහරගම සහ වැලිකඩ පොලිස් කොට්ඨාස පිළිබඳව ද සඳහන් කරමින් ඔහු පැවසුවේය.

පසුගියදා බිංගිරිය හල්මිල්ලවැව ප්‍රදේශයේ සිදුවූ සිද්ධියක් සඳහන් කරමින් ඔහු පෙන්වා දුන්නේ හෙට්ටිපොළ පොලිසියට අනුයුක්තව සේවය කළ පොලිස් නිලධාරියකුගේ මැදිහත්වීමෙන් ලීසිං සමාගමක වාහන අත්පත් කර ගන්නා පිරිසක් කාන්තාවකගේ යතුරුපැදියක් පැහැර ගත් බවයි.

ලීසිං සමාගම තමාට පූර්ව දැනුම්දීමක් නොකළ බවට ඇය චෝදනා කර ඇත.

වැලිකඩ පොලිස් වසමේ පසුගියදා එවැනිම සිදුවීමක් වාර්තා වූ අතර, කාන්තාවකගෙන් ඇයගේ වැගන් ආර් මෝටර් රථය අත්පත් කර ගැනීමට පෙර ඇයට පහරදීමේ සිද්ධියක් ද වාර්තා විය.

මෑත සිදුවීමකදී, ගොඩනැගිලි කොන්ත්‍රාත්කරුවකු වූ ජාලිය පරාක්‍රම (35) ම්ලේච්ඡ ප්‍රහාරයකින් තුවාල ලබා මිය ගියේය.

වාහනය අත්පත් කර ගත් කණ්ඩායම විසින් ඔහුගේ ටිපර් රථය පාලනය කර ලබා ගැනීමට පෙර ඔහු මතින් ධාවනය කර තිබේ.

ඔහුගේ වාරික හිඟ වී ඇත්තේ මාස දෙකක කාලයක් සඳහා පමණි.

ජාලියගේ පියා ජී.ඩී.එන්. පරාක්‍රම කියා සිටියේ පසු දිනයේ වෙන්දේසියට තැබීමට නියමිතව තිබූ ටිපර් රථයත් තම පුතාත් මෙමගින් අහිමි වූ බවයි.

සාධාරණයක් ඉටු වී නැතැයි ද කීවේය.

ලීසිං සමාගම්වලට ගෙවිය යුතු සම්පූර්ණ මුදල ගෙවිය හැක්කේ ස්වල්ප දෙනෙකුට වන අතර බොහෝ දෙනෙකුට තම දේපළ විකිණීමට සිදුවේ.

මෑතක දී ඉහළ පෙළේ බලධාරීන් සමඟ පැවති සාකච්ඡාවකදී සංගමයේ සාමාජිකයන් මුහුණ දෙන ගැටලු පිළිබඳව අවධානය යොමු වූ අතර එහිදී මෙම නීති විරෝධී ආයතන වසා දැමීම සඳහා සුදුසු ක්‍රමවේදයක් සකස් කිරීම වෙනුවට වංක රාජ්‍ය නිලධාරීන් ලීසිං මාෆියාව සමඟ හවුල් වන ආකාරය පෙන්වා දුන් බව පොතුපිටිය පැවසීය.

වාරික ගෙවීමේදී ගනුදෙනුකරුවන් පසුබට වුවහොත් මූල්‍ය සමාගම් විසින් අත්පත් කර ගැනීම් නැවැත්වීමට නව ක්‍රියාමාර්ග ගත යුතු බව ද ඔහු පැවසීය.

වාහන ලීසිං කරන ශ්‍රී ලාංකිකයන් ආරක්ෂා කිරීම සඳහා නව නීති ගෙන ඒම ගැන සළකා බැලීම රජයේ වගකීමක් බවත් පවතින නඩු සෘජුවම අපරාධ පරීක්ෂණ දෙපාර්තමේන්තුවට පැවරිය යුතු බවත් වගකිව යුත්තන් යුක්තියට මුහුණ දිය යුතු බවත් ඔහුගේ සංගමය අවධාරණය කරයි.

මේ අතර ලීසිං පැමිණිලි සම්බන්ධයෙන් සොයා බලා මූල්‍ය සහ ලීසිං සමාගම්වලට එරෙහිව නීතිමය පියවර ගන්නා ලෙස පොලිසියට නියෝග කර තිබේ.

පසුගිය වසරේ චක්‍රලේඛයක් නිකුත් කළද, බලහත්කාරයෙන් වාහන අත්පත් කර ගැනීම් ඉහළ යෑම සහ ලීසිං පැමිණිලිවලට ප්‍රතිචාර දැක්වීමේදී පොලිස් නිලධාරීන්ගේ අකාර්යක්ෂමතාව පිළිබඳ මේ වන විට කණස්සල්ල පළ වී තිබේ.

පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව පැවසුවේ නියෝග නොතකා කටයුතු කරන පොලිස් නිලධාරීන්ට දැඩි විනය ක්‍රියාමාර්ගවලට මුහුණ දීමට සිදුවන බවයි.

පොලිස් නිලධාරීන්ට එරෙහි පැමිණිලි විමර්ශනය කරමින් පවතින බවත්, නීතියට පිටින් කටයුතු කර ඇත්නම් ඔවුන්ට එරෙහිව දැඩි ක්‍රියාමාර්ග ගන්නා බවත් ඔහු පැවසීය.