දැනටමත් ප්‍රකාශයට පත් කර ඇති විදුලි ප්‍රතිසංස්කරණ පනත් කෙටුම්පතට පාර්ශ්වකරුවන්ගේ සහ ණය දෙන ආයතනවල ප්‍රතිචාර අනුව සංශෝධන 26ක් සිදුකර ඇති බව බලශක්ති ඇමැති කංචන විජේසේකර පැවසීය.

පාර්ශ්වකරුවන්, දේශපාලන පක්ෂ සහ වෘත්තීය සමිතිවල ප්‍රතිපෝෂණ අනුව යමින් යෝජිත සංශෝධන 46ක් නිෂ්කාශනය සඳහා නීති කෙටුම්පත් දෙපාර්තමේන්තුව වෙත යොමු කර ඇති බව ඇමැතිවරයා කොළඹදී ජනමාධ්‍යවේදීන් අමතමින් පැවසීය.

කැබිනට් අනුමැතියෙන් පසු සංශෝධිත පනත් කෙටුම්පත අප්‍රේල් මාසයේදී පාර්ලිමේන්තුවට ඉදිරිපත් කිරීමට නියමිතව තිබේ.

විෂයභාර ඇමැතිවරයාට අධික බලතල ලබාදෙන විධිවිධාන කිහිපයක් ඇතුළත් පනත් කෙටුම්පත පිළිබඳ විවිධ පාර්ශ්වකරුවන්ගේ කණස්සල්ල ද පළ වී තිබිණි.

පනත් කෙටුම්පතට අනුව විදුලිය මිලදී ගැනීම රාජ්‍ය ඒකාධිකාරයක් ලෙස දිගටම පැවතිය යුතු විය.

රාජ්‍ය ඒකාධිකාරය සහ විශේෂයෙන්ම පුනර්ජනනීය බලශක්තිය සඳහා නව බලාගාරවලට අදාළ ටෙන්ඩර් කිරීම ප්‍රසිද්ධ කිරීමට ඉහළ බලධාරීන්ගේ ඇති අකමැත්ත සම්බන්ධයෙන් ද කණස්සල්ල පළවී තිබේ.

තරඟකාරී නොවන ටෙන්ඩර් කිරීමේ ක්‍රමයක් වෙත යෑමට ශ්‍රී ලංකාව පවතින විදුලි නීතිය වෙනස් කරමින් සිටින්නේ විරෝධතා මධ්‍යයේය.

රාජ්‍යයේ විශාලතම ප්‍රසම්පාදන කොන්ත්‍රාත්තු අතර විදුලිබල මිලදී ගැනීමේ ගිවිසුම් ගණනාවක් පවතී.