ශ්‍රී ලංකාවේ සහ ඕස්ට්‍රේලියාවේ ඛනිජ කැණීමේ අවස්ථා පිළිබඳ සාකච්ඡා කිරීමට ඉන්දීය පතල් අමාත්‍යංශය ජනවාරි මාසයේදී කර්මාන්තයේ නියැළී සිටින පාර්ශ්වකරුවන් සමඟ රැස්වීම් දෙකක් පවත්වා තිබේ.

විදේශීය ඛනිජ වත්කම් අත්පත් කර ගැනීම හරහා ඉන්දියාවේ තීරණාත්මක ඛනිජ සැපයුම් දාමය ශක්තිමත් කිරීම මෙම රැස්වීම් සංවිධානය කිරීමේ අරමුණ වී තිබේ.

ශ්‍රී ලංකාවේ මිනිරන් කැණීමේ අපේක්ෂාවන් පිළිබඳ Ola Electric, Hindalco Industries, and Gujarat Mineral Development Corporation ඇතුළු සමාගම්වල නියෝජිතයන් ඉන්දීය පතල් අමාත්‍යංශය සමඟ සාකච්ඡා පවත්වා තිබුණේ ජනවාරි 5 වැනිදායි.

ඉන් දින තුනකට පසුව, ඕස්ට්‍රේලියාවේ පතල් කැණීමේ අවස්ථා සොයාබැලීම සඳහා දිවා භෝජන සංග්‍රහයක් සංවිධාන කර තිබේ.

ඕස්ට්‍රේලියාවට නම් කරන ලද ඉන්දීය මහ කොමසාරිස් Gopal Bagley සහ Coal India, Steel Authority of India, Vedanta, Tata Steel, Adani Group, සහ JSW Steel ඇතුළු සමාගම්වල නියෝජිතයන් එම අවස්ථාවට සහභාගී වී ඇත.

ශ්‍රී ලංකාව සතුව සැළකිව යුතු මිනිරන් සංචිතයක් තිබේ.

එය ශ්‍රී ලංකාවේ පමණක් දක්නට ලැබෙන ඉතා පිරිසිදු ස්වාභාවික මිනිරන් වර්ගයකි.

මිනිරන් යනු ලිතියම්-අයන බැටරිවල ඇනෝඩ ද්‍රව්‍ය ලෙස බහුලව භාවිත වන තීරණාත්මක ඛනිජයකි.

බර අනුව, සාමාන්‍යයෙන් ලිතියම්-අයන බැටරිවල විශාලතම සංරචකය මිනිරන් වන අතර සාමාන්‍ය විද්‍යුත් වාහනයකට මිනිරන් කිලෝග්‍රෑම් 70ක් දක්වා භාවිත වේ.

විද්‍යුත් වාහනවලට මිනිරන්වල ඇති වටිනාකම අදාළ රැස්වීමට Ola Electric සහභාගී වීම මගින් පැහැදිලි වේ.

විද්‍යුත් වාහනවල බැටරිවල කැතෝඩ ද්‍රව්‍ය ලෙස භාවිත කරන තඹ කැණීම සඳහා සැම්බියාවේ ඇති අවස්ථා පිළිබඳ පසුගිය ඔක්තෝබර් මාසයේ පැවති අමාත්‍යංශ රැස්වීමකට ද ඔවුන් සහභාගී වී තිබිණි.

ශ්‍රී ලංකාවේ මිනිරන් පිළිබඳ ඉන්දියාවේ උනන්දුව ශ්‍රී ලංකා රජය විසින් රට තුළ මිනිරන් කැණීම සඳහා ඉන්දියානු සමාගම් සක්‍රීයව හඹා යෑම සමග සමපාත වේ.

“ලෝකයේ හොඳම මිනිරන් අප සතුව තිබෙනවා. දැන් ඉන්දියානු සමාගම් විදුලි වාහන නිෂ්පාදනය කරමින් ඉන්නවා. විදුලි බැටරි සඳහා විශාල සංරචකයක් වන්නේ මිනිරන්. ඉස්සර අපේ මිනිරන් පතල් 30,000ක් විතර තිබුණා. එම නිසා මෙම ඉන්දියානු සමාගම් සතුව ඇති විශේෂඥතාව සහ තාක්ෂණය සමඟ බොහෝ අවස්ථාවන් තිබෙනවා, ඔවුන් ශ්‍රී ලංකාව දෙස බැරෑරුම් ලෙස බැලිය යුතුයි කියලා මම හිතනවා.” යනුවෙන් ශ්‍රී ලංකා විදේශ කටයුතු රාජ්‍ය ඇමැති තාරක බාලසූරිය පෙබරවාරි 22 දා ඉන්දීය මාධ්‍ය ආයතනයක් සමග පැවති සම්මුඛ සාකච්ඡාවකට එක්වෙමින් පැවසීය.

ලෝක යුද්ධ දෙක පැවති 20 වැනි සියවසේ ශ්‍රී ලංකාවේ මිනිරන් කැණීම උපරිමයට පැමිණි අතර වාර්ෂික අපනයන ටොන් 30,000කට වඩා වැඩි විය.

කෙසේවෙතත්, 2023 දී, ශ්‍රී ලංකාව අපනයනය කළේ ටොන් 2,500ක් පමණ බරැති සහ දළ වශයෙන් ඩොලර් මිලියන 6ක් වටිනා මිනිරන් පමණි.

එක්සත් ජනපද භූ විද්‍යා සමීක්ෂණ දත්තවලට අනුව ශ්‍රී ලංකාව සතුව මිනිරන් සංචිත ටොන් මිලියන 1.3ක් පමණ ඇත.