බලුකිස්ථාන් නීතීඥ කවුන්සිලය පාකිස්ථාන පෙබරවාරි 8 මහ මැතිවරණයේ දූෂිතයන්ට එරෙහිව උද්ඝෝෂණයක් නිවේදනය කර තිබේ.

“බලුකිස්ථාන් නීතිඥ කවුන්සිලය හැකි ඉක්මනින් බලුකිස්ථාන් නීතිඥ සමුළුවක්, සර්ව පාක්ෂික සමුළුවක් සහ රටපුරා නීතිවේදීන්ගේ සමුළුවක් පැවැත්වීමට තීරණය කර ඇති අතර ඉදිරි ක්‍රියාමාර්ග තීරණය කරනු ඇත” එය වැඩිදුරටත් සඳහන් කර තිබේ.

පසුගිය සතියේ Baloch, Pashtoon සහ Hazara ජාතිකවාදී පක්ෂ සන්ධානයක නායකයන් මැතිවරණ ක්‍රියාවලිය දූෂණයෙන් විනාශ වී ඇති බවට චෝදනා කරමින් ඊයේ (21) වැඩවර්ජනයකට කැඳවූ බව වාර්තා වේ.

එසේම, දේශපාලනයේ සිවිල් හා මිලිටරි මැදිහත්වීම් නතර කරන පක්ෂවලට සහය දෙන බව ප්‍රකාශ කර ඇත.

බලුකිස්ථාන් ජාතික පක්ෂය-Mengal (BNP-M), Pakhtunkhwa Milli Awami පක්ෂය, ජාතික පක්ෂය සහ Hazara ප්‍රජාතන්ත්‍රවාදී පක්ෂය ඇතුළු ජාතිකවාදී පක්ෂ කිහිපයක් පසුගිය සතිය පුරාවට මහා මැතිවරණයේ දී පුලුල්ව සිදු වූ වංචාවන් චෝදනා කරමින් විරෝධතා පවත්වමින් සිටිති.