අධ්‍යාපන අමාත්‍යාංශය විසින් නිකුත් කර ඇති චක්‍රලේඛයට අනුව 1, 5, සහ 6 ශ්‍රේණි මෙන්ම උසස් පෙළ හැර 2024 වසර සඳහා අතරමැදි පන්ති සඳහා සිසුන් ඇතුළත් කර ගැනීමේ අයැදුම්පත් සෘජුවම අදාළ පාසල් වෙත ඉදිරිපත් කළ යුතුය.

එම පාසල්වල පුරප්පාඩු තිබේ නම්, අධ්‍යාපන අමාත්‍යාංශයේ චක්‍රලේඛවලට අනුව අදාළ පාසල් විදුහල්පතිවරුන් සම්මුඛ පරීක්ෂණ පවත්වා තෝරාගත් සිසුන්ගේ ලැයිස්තුව අනුමැතිය සඳහා අමාත්‍යාංශය වෙත යොමුකරනු ඇත.

විශේෂ නිවේදනයක් නිකුත් කරමින් අමාත්‍යාංශය සඳහන් කර ඇත්තේ, පාසල්වල හය ශ්‍රේණියට සිසුන් ඇතුළත් කිරීම සිදුකරන්නේ පහ ශ්‍රේණියේ ශිෂ්‍යත්ව විභාගයේ ලකුණු මත පමණක් බවයි.

මේ අතර, 2024 වසර සඳහා පළමු ශ්‍රේණියට සිසුන් ඇතුළත් කරගැනීම සඳහා වන අයැදුම්පත් අදාළ පාසල් වෙත යොමුකළ යුතු බවත්, ඉන් අනතුරුව අදාළ විදුහල්පතිවරුන් විසින් සම්මුඛ පරීක්ෂණ පවත්වන බවත් අමාත්‍යාංශය පවසයි.