බුත්තල, පුහුල්කොටුව ප්‍රදේශයේ වරෙන්තුකරුවකු ඉකුත්දා (25) අත්අඩංගුවට ගැනීමට ගිය බුත්තල පොලිසියේ පොලිස් නිලධාරීන් දෙදෙනෙකුට මෝල් ගසකින් පහරදීමෙන් එක් පොලිස් සැරයන්වරයකුට තුවාල සිදු වී ඇතැයි බුත්තල පොලිසිය පවසයි.

බුත්තල පොලිසියේ පොලිස් සැරයන්වරුන්වන (75075) ඉන්දික, (71833) ජයසූරිය යන දෙදෙනා පෞද්ගලික යතුරු පැදියකින් වරෙන්තුකරු අත්අඩංගුවට ගැනීමට ගිය අවස්ථාවේදී ඔහුගේ නිවස අසල සිටි තරුණයන් සිව්දෙනකු පොලිස් නිලධාරීන්ට මෙලෙස මෝල් ගසකින් පහර දී ඇත.

එසේ පහර දීමෙන් එක පොලිස් නිලධාරියකුගේ වම් අතේ මැණික් කටුව අසල අස්ථි බිඳී ඇති අතර, ඔහු දැනට මොනරාගල දිස්ත්‍රික් මහ රෝහලේ ප්‍රතිකාර ලබමින් පසුවෙයි.

සිද්ධියෙන් පසු එම ස්ථානයට ගිය බුත්තල පොලිසියේ නිලධාරීන් කණ්ඩායමක් පහරදීම සම්බන්ධයෙන් සැකකරුවන් දෙදෙනකු අත්අඩංගුවට ගෙන ඇත.

ඉතිරි දෙදෙනා අත්අඩංගුවට ගැනීමට පරීක්ෂණ ආරම්භ කර තිබේ.(දිවයින)