January 26, 2024
විකල්ප යෝජනා තිබේ නම් අන්තර්ජාතික මූල්‍ය අරමුදල සමඟ සාකච්ඡා කිරීමට එක්වන ලෙස ජනාධිපති රනිල් වික්‍රමසිංහ පාර්ලිමේන්තුවේ සියලුම දේශපාලන පක්ෂ නායකයන්ට ආරාධනා කළේය.
ජනාධිපතිවරයා ප්‍රකාශ කළේ ඒ සඳහා අන්තර්ජාතික මූල්‍ය අරමුදලේ කළමණාකාර අධ්‍යක්ෂවරියට මෙරටට පැමිණෙන ලෙස ඇරයුම් කිරීමට තමා සුදානම් බවයි.
රට ජයග්‍රහණය කරා ගෙන යෑමේදී එකමුතුකමේ වැදගත්කම අවධාරණය කළ ඔහු ගිවිසුමෙන් ඉවත්වීම මගින් ශ්‍රී ලංකාවේ ආර්ථිකය පිළිබඳ විශ්වාසය පළුදු වන බව අවධාරණය කළේය.
පොරොන්දු දේශපාලනය නිසා ජාතියේ ආර්ථිකය කඩා වැටුණු බව අවධාරණය කළ ජනාධිපතිවරයා මැතිවරණයකට සූදානම් වන විට රටේ සංවර්ධනය සඳහා සියලු දේශපාලන පක්ෂ පුළුල් සැලසුම් සකස් කිරීමේ අවශ්‍යතාව අවධාරණය කළේය.
ජනාධිපති රනිල් වික්‍රමසිංහ මෙම අදහස් පළ කළේ කොළඹ රේගු මූලස්ථානයේ අද පෙරවරුවේ පැවති අන්තර්ජාතික රේගු දින සැමරුම් උත්සවය අමතමිනි.
2023 වසරේ රේගු ආදායමට ලබාදුන් දායකත්වය පිළිබඳ ජනාධිපතිවරයා රේගු දෙපාර්තමේන්තුවේ සියලුම සාමාජිකයන් වෙත කෘතඥතාව පළ කළේය.
රේගු බදු, වැට් සහ ආදායම් බද්ද ගෝලීය වශයෙන් ප්‍රධාන ආදායම් මාර්ග තුන ලෙස හුවා දක්වමින් රේගු කාර්යක්‍ෂමතාව ඉහළ නැංවීමේ වැදගත්කම ද ජනාධිපතිවරයා අවධාරණය කළේය.
ඉදිරියේ දී එන රජයේ නීති සම්පාදනයන් සහ නවීකරණ මුලපිරීම් මගින් රාජ්‍ය ආදායම් උත්පාදනය කරන සියලුම ආයතන ප්‍රතිසංස්කරණය කරනු ඇති බව ඔහු වැඩිදුරටත් සඳහන් කළේය.
