January 16, 2024
ශ්‍රී ලංකාවේ ණය වැඩසටහන අධීක්‍ෂණය කරන අන්තර්ජාතික මූල්‍ය අරමුදලේ ජ්‍යෙෂ්ඨ නිලධාරීන් කණ්ඩායමක් ප්‍රථම වරට උතුරු දිස්ත්‍රික්කයේ යාපනයේ සංචාරය කර ඇති බව එම නිලධාරීහු ඊයේ ප්‍රකාශ කළහ.
අන්තර්ජාතික මූල්‍ය අරමුදලේ ශ්‍රී ලංකාවේ ජ්‍යෙෂ්ඨ මෙහෙවර ප්‍රධානී පීටර් බෲවර්ගේ නායකත්වයෙන් යුත් මෙම කණ්ඩායම පසුගිය සතියේ උතුරු පළාත් ආණ්ඩුකාර පී.එම්.එස්. චාල්ස් සහ අනෙකුත් ජ්‍යෙෂ්ඨ නිලධාරීන් හමුවී පළාතේ ආර්ථික වර්ධනය, ගැටුමින් අවතැන් වූ පුද්ගලයන් නැවත පදිංචි කිරීම, වින්දිතයන් සඳහා වන්දි ගෙවීම සහ බිම්බෝම්බ ඉවත් කිරීමේ වැඩසටහන් සම්බන්ධ ගැටලු සාකච්ඡා කර තිබේ.
යාපනය විශ්ව විද්‍යාලයට අදාළ අධ්‍යාපනික කටයුතු, පශ්චාත් කොවිඩ් මෙහෙයුම් සහ දේශගුණික විපර්යාස හේතුවෙන් උතුරු ප්‍රදේශයට ඇති වන අහිතකර බලපෑම් පිළිබඳව ද සාකච්ඡා කළ බව නිලධාරීහු පවසති.
සඳුදා ආපසු කොළඹට පැමිණි කණ්ඩායම මුදල් අමාත්‍යාංශය සමඟ සම්බන්ධවීමට නියමිතය.
එම කණ්ඩායම ජනාධිපති රනිල් වික්‍රමසිංහ යටතේ දේශීයව, මූල්‍ය අරමුදලේ මැදිහත්වීම මෙහෙයවන මුදල් රාජ්‍ය ඇමැති ෂෙහාන් සේමසිංහ සමඟ සාකච්ඡා කිරීමට බලාපොරොත්තු වේ.
ශ්‍රී ලංකාවේ මහා පරිමාණ ආර්ථික ප්‍රතිසංස්කරණ වෙනුවෙන් පෙනීසිටින වත්මන් අන්තර්ජාතික මූල්‍ය අරමුදලේ වැඩසටහනේ දක්වා ඇති ඉලක්ක කෙරෙහි අවධානය යොමුකිරීමට කොළඹ දී පැවැත්වෙන සාකච්ඡාවලදී අපේක්ෂා කෙරේ.
