වාහන ආනයනය සඳහා සාමාන්‍ය තහනමක් පනවා තිබුණ ද කම්කරු හා විදේශ රැකියා අමාත්‍යංශය විසින් සංශෝධිත ආනයන හා අපනයන (පාලන) පනත යටතේ ක්‍රීඩා උපයෝගිතා වාහනයක් (SUV) ආනයනය කිරීමට නියමිතව තිබේ.

1969 අංක 1 දරන ආනයන හා අපනයන (පාලන) පනත සංශෝධනය කිරීම සඳහා නිකුත් කරන ලද ගැසට් නිවේදනයක් අනුව අමාත්‍යංශ තුනකට සහ ජාතික ගුවන් සේවය වන ශ්‍රීලංකන් ගුවන් සේවය සඳහා තෝරාගත් වාහන ආනයනය කිරීමට අවසරදීම සඳහා රෙගුලාසි හඳුන්වා දෙන ලදී.

SUV රථයට අමතරව අධ්‍යාපන අමාත්‍යංශය සඳහා බස්රථ දෙකක්, ජංගම මාතෘ ඒකක තුනක්,සෞඛ්‍ය අමාත්‍යංශය සඳහා ද්විත්ව කැබ් රථ 21ක්, ශ්‍රීලංකන් ගුවන් සේවය සඳහා ආර්ථික මට්ටමේ රැම්ප් රථයක් සංශෝධිත ගැසට් නිවේදනය යටතේ ආනයනය කිරීමට නියමිතය.

මුදල්, ආර්ථික ස්ථායීකරණ සහ ජාතික ප්‍රතිපත්ති ඇමැතිවරයා වශයෙන් ජනාධිපති රනිල් වික්‍රමසිංහ විසින් ජනවාරි 11 වැනි දිනැති මෙම ගැසට් පත්‍රය නිකුත් කරන ලදී.

වරාය, නාවික හා ගුවන් සේවා ඇමැතිවරයා විසින් ඉදිරිපත් කරන ලද 2023 නොවැම්බර් 28 දිනැති සංදේශ අංක 23/2288/628/105/TBR මත පසුගිය වසරේ දෙසැම්බර් 11 දිනැති ඇමැති මණ්ඩලයේ තීරණය අනුව මෙම රෙගුලාසි නිකුත් කර තිබේ.

“2023 දෙසැම්බර් 06 දිනැති මුදල්, ආර්ථික ස්ථායීකරණ සහ ජාතික ප්‍රතිපත්ති පිළිබඳ ඇමැතිවරයාගේ නිරීක්ෂණ සමඟ එක්ව කියවන්න” යනුවෙන් ගැසට් පත්‍රයේ සඳහන් වේ.

ඒ අනුව අදාළ අමාත්‍යංශයේ ප්‍රධාන ගිණුම් නිලධාරීවරයාගේ නිර්දේශය මත සහ මෝටර් වාහන ආනයනය කිරීමේදී පවතින අනෙකුත් නීතිරීතිවලට යටත්ව වාහන ආනයනය කිරීමට අවසර දෙන ලෙස රේගු අධ්‍යක්ෂ ජනරාල්වරයාට දැනුම් දෙන ලදී.