ඉරානයේ කර්මන් ත්‍රස්ත ප්‍රහාරය සම්බන්ධයෙන් විදේශ ඇමැති අලි සබ්රි එරට විදේශ ඇමැති අමීර්-අබ්දුල්ලාහියන් වෙත ශෝකය පළකර තිබේ.

ඉරාන විදේශ ඇමැතිවරයා වෙත දුරකථන ඇමතුමක් ලබාදෙමින් මෙම ශෝකය පළ කිරීම සිදුකර තිබේ.

“අපගේ ආරක්ෂක අංශ ප්‍රහාරවල සංවිධායකයන් සහ එය සිදුකළ අය පිළිබඳ විස්තර තක්සේරු කර තොරතුරු සම්පූර්ණ කරමින් සිටිනවා,” යනුවෙන් ඉරාන විදේශ ඇමැති අමීර්-අබ්දුල්ලාහියන් අලි සබ්රි ඇමැතිවරයාට ප්‍රකාශ කර තිබේ.

අන්තර්ජාතික ප්‍රජාව ත්‍රස්තවාදයට එරෙහිව බැරෑරුම් ලෙස සටන් කිරීමේ අවශ්‍යතාව ද ඉරාන රාජ්‍ය තාන්ත්‍රිකයා අවධාරණය කළේය.

අලි සබ්රි ඇමැතිවරයා කර්මන් ත්‍රස්තවාදී ප්‍රහාර දැඩි ලෙස හෙළාදැක ඇති අතර, ඛේදවාචකය සම්බන්ධයෙන් ශ්‍රී ලාංකික ජනතාවගේ සහ රජයේ කණගාටුව ප්‍රකාශ කර තිබේ.

ඉරානයේ දිවංගත ත්‍රස්ත විරෝධී අණදෙන නිලධාරියකු වූ ලුතිනන් ජෙනරාල් කාසෙම් සොලෙයිමානි ඝාතනයේ සිව්වැනි සංවත්සරය වෙනුවෙන් නැගෙනහිර කර්මාන්හි ඔහුගේ සොහොනේදී පැවති සැමරුම් උත්සවයකට බෝම්බ ප්‍රහාර දෙකක් එල්ලවූයේ පසුගිය ජනවාරි 3 වැනි දිනයි.

මෙම ප්‍රහාරවලින් ඉරාන ජාතිකයන් 76ක් සහ ඇෆ්ගන් ජාතිකයන් 13ක් ඇතුළුව අවම වශයෙන් පුද්ගලයන් 91 දෙනෙකු මිය ගිය අතර තවත් 284 දෙනෙකු තුවාල ලැබීය.

ඉරාන රජය මෙම බෝම්බ ප්‍රහාරය ත්‍රස්තවාදී ප්‍රහාරයක් ලෙස ප්‍රකාශයට පත් කළේ එය 1978 සිදු වූ සිනමා රෙක්ස් ප්‍රහාරයෙන් පසු රටේ සිදුවූ එවැනි මාරාන්තික සිදුවීම බවට නම් කරමිනි.