ලබන වසරේ පැවැත්වීමට නියමිත මැතිවරණ සඳහා අවශ්‍ය තරම් ප්‍රතිපාදන රජය සතුව පවතින බව මහා භාණ්ඩාගාරය ඊයේ (30) තහවුරු කළේය.

භාණ්ඩාගාර නියෝජ්‍ය ලේකම් ආර්.එම්.පී.රත්නායක අවධාරණය කළේ මෑත කාලීන බදු සංශෝධන හේතුවෙන් ඇති වූ සැළකිව යුතු බදු එකතුව ශක්තිමත් මූල්‍ය තත්ත්වයට දායකවන ප්‍රධාන සාධකයක් බවයි.

ඔහු තවදුරටත් අවධාරණය කළේ, රජයේ ආදායම් එකතු කිරීමේ සැළකිව යුතු ඉහළ යෑමක් සිදුව ඇති බවයි.

ජනවාරි 01 වැනිදා ආරම්භ කිරීමට නියමිත නව බදු ක්‍රියාත්මක කිරීම රජයේ අදායම් අඛණ්ඩ ඉහළ යෑමේ ප්‍රවණතාවක් අපේක්ෂා කෙරෙන අතර රජයේ මූල්‍ය සංචිතයට අමතර දායකත්වයක් එමගින් අපේක්ෂා කරන බව ඔහු පෙන්වාදුන්නේය.

“මේ වන විට අපි හොඳ මූල්‍ය තත්ත්වයක සිටිනවා. ණය ප්‍රතිව්‍යුහගතකරණය කිරීමේ ක්‍රියාවලිය සඳහා අදාළ පාර්ශ්වකරුවන් සමඟ මේ වන විට සාකච්ඡා පවත්වමින් සිටිනවා. ආදායම් ඉපැයීම් විශාල ලෙස ඉහළගොස් තිබෙන අතර ඉදිරි වසර තුළ තවදුරටත් වර්ධනයක් අපේක්ෂා කරනවා, ”රත්නායක පැවසීය.

මේ අතර, පසුගිය සතියේ ජනාධිපති මාධ්‍ය අංශය නිකුත් කළ නිවේදනයක දැක්වුණේ, සියලුම සහතික කළ වියදම් සඳහා ගෙවීම් කරමින් වසර 25කට පසු හිඟ ගෙවීම් නොමැතිව අවසන් වූ පළමු වසර ලෙස ශ්‍රී ලංකාව 2023 වසර අවසන් කළ බවයි.

දෙසැම්බර් 15 දක්වා බිල්පත් ඉදිරිපත් කර ඇති සියලුම අනුමත සහ සහතික කළ ගෙවීම් ගෙවා ඇත.

2022 අවසානය දක්වා මාස 18ක් පුරාවට එකතු වී තිබූ විශ්‍රාම වැටුප්හි හිඟ මුදල් ද 2023 වන විට නිෂ්කාශනය කර තිබේ.

රාජ්‍ය මූල්‍ය කළමනාකරණයේ වැඩිදියුණු කිරීම් යටතේ, අන්තර්ජාතික මූල්‍ය අරමුදලේ (IMF) අනුග්‍රහය ලබන වැඩසටහනක් යටතේ ශ්‍රී ලංකාව හිඟ මුදල් ගෙවීමට අපේක්ෂා නොකළ බව එම නිවේදනයේ සඳහන් වේ.

ශ්‍රී ලංකා මහ බැංකුවේ සංඛ්‍යාලේඛනවලට අනුව, අපනයනවල වැඩිදියුණු වීමක් සහ ආනයනවල සංකෝචනයක ඒකාබද්ධ බලපෑමේ ප්‍රතිඵලයක් ලෙස, 2023 ඔක්තෝබර් සහ නොවැම්බර් මාසවල වෙළඳ හිඟය පෙර වසරකට සාපේක්ෂව අඩුවිය.

2022 සැප්තැම්බර් මාසයෙන් පසු ප්‍රථම වරට අපනයන වසරින් වසර වර්ධනයක් වාර්තා කළේය.

මාසික සේවක ප්‍රේෂණ ඩොලර් මිලියන 500 ඉක්ම වූ අතර 2022 වසරේ අනුරූප කාලපරිච්ඡේදයට සාපේක්ෂව 2023 නොවැම්බර් මාසයේදී කැපීපෙනෙන වර්ධනයක් වාර්තා කළේය.

උත්සව සමයේ සංචාරක පැමිණීම් ඉහළ ගොස් සංචාරක ව්‍යාපාරය ඉහළ ඉපැයීම්වලට දායක විය.

2023 නොවැම්බර් අවසානය වන විට දළ නිල සංචිත ප්‍රමාණය ඩොලර් බිලියන 3.6ක් විය.

2023 නොවැම්බර් මාසයේදී ශ්‍රී ලංකා රුපියල එක්සත් ජනපද ඩොලරයට සාපේක්ෂව ස්ථාවරව පැවතිණි.

මහ බැංකු සංඛ්‍යාලේඛනවල සඳහන්කර ඇති පරිදි, 2023 නොවැම්බර් අවසානය වන විට දළ නිල සංචිත ඩොලර් බිලියන 3.6ක් ලෙස ඇස්තමේන්තු කර ඇත.

මෙයට චීනයේ මහජන බැංකුවේ ඩොලර් බිලියන 1.4 කට සමාන හුවමාරු පහසුකමක් ද ඇතුළත් වේ.

මේ අතර මැතිවරණ කොමිෂන් සභාව පසුගියදා ප්‍රකාශ කළේ ලබන වසරේ පැවැත්වෙන ජනාධිපතිවරණය ඇතුළු ඉදිරි මැතිවරණ තුනකට තමන් භාණ්ඩාගාරයට ඉදිරිපත් කළ මුළු අයවැය ඇස්තමේන්තුව රු.බිලියන 10ක් බවයි.

කොමිෂන් සභා වාර්තාවට අනුව, ඉදිරි ජනාධිපතිවරණය ලබන වසරේ සැප්තැම්බර් 16 සහ ඔක්තෝබර් 17 අතර පැවැත්වීමට අපේක්ෂා කරන අතර, මහ මැතිවරණය සඳහා අපේක්ෂිත දිනය 2025 වසරේ වේ.

මේ අතර, ජනාධිපතිවරණය සහ පාර්ලිමේන්තු මැතිවරණය යන දෙකම ලබන වසරේ පැවැත්වීමට නියමිත බව ජනාධිපති රනිල් වික්‍රමසිංහ පසුගියදා පාර්ලිමේන්තුවට දැනුම්දී ඇත.