පෙට්‍රල් සහ ඩීසල් සඳහා එකතු කළ අගය මත බද්ද හෙවත් වැට් බද්ද හඳුන්වාදීමත් සමඟ ලබන මාසයේදී ඉන්ධන මිල 10%කින් ඉහළ නැංවීමට සූදානම් බව වාර්තා වේ.

ඒ අනුව පෙට්‍රල් ලීටරයක මිල ආසන්න වශයෙන් රු. 372ක් සහ ඩීසල් මිල රු.359ක් වනු ඇත.

පසුගිය සතියේ රජය විසින් ප්‍රකාශයට පත්කළ පරිදි, වැට් බද්ද ක්‍රියාත්මක කිරීමත් සමඟ දැනට ඉන්ධන සහ ගෑස් මිල සඳහා ඇතුළත් කර ඇති වරාය සහ ගුවන් තොටුපළ සංවර්ධන බද්ද හෙවත් පැල් (PAL) ඉවත් වනු ඇත.

2024 ජනවාරි 01 වැනිදා සිට බලපැවැත්වෙන පරිදි 18% වැට් බද්ද හඳුන්වාදීමට සමගාමීව ඉන්ධන සඳහා වන 7.5% පැල් සහ ද්‍රව පෙට්‍රෝලියම් ගෑස් (LPG) සඳහා 2.5% පැල් ඉවත් කරන බව වාර්තා වේ.

ඉදිරි ඉන්ධන මිල ඉහළයෑම තහවුරු කරමින් නියෝජ්‍ය භාණ්ඩාගාර ලේකම් ආර්.එම්.පී.රත්නායක වැට් බදු බලපෑම මධ්‍යස්ථ වනු ඇති බවත්, පැල් ඉවත් කිරීම බලපෑම අවම කරනු ඇති බවත් සහතික විය.

2023 අංක 32 දරන අගය එකතු කළ බදු (සංශෝධන) පනත, දෙසැම්බර් 13 වැනි දින නිල වශයෙන් සහතික කර පසුව දෙසැම්බර් 15 වැනි දින ගැසට් පත්‍රයේ ප්‍රකාශයට පත්කරන ලද අතර, එය මේ වනවිට දේශීය ආදායම් දෙපාර්තමේන්තුව විසින් නිකුත් කර ඇත.

මෙම යාවත්කාලීන වැට් පනතේ පළමු උපලේඛනයේ III කොටසේ දක්වා ඇති නව වැට් බදු නිදහස් කිරීම් ලැයිස්තුවක් හඳුන්වාදීම ඇතුළුව සැළකිව යුතු වෙනස්කම් ඇතුළත් වේ.

2024 ජනවාරි 1 වැනිදා සිට බලපැවැත්වෙන පරිදි, මෙම නව ලැයිස්තුව II කොටස යටතේ පවතින වැට් බදු නිදහස් කිරීම් ප්‍රතිස්ථාපනය කරන්නේ බදු රාමුවේ ප්‍රධාන වෙනසක් සනිටුහන් කරමිනි.

මේ යටතේ දැනට පවතින වැට් බද්ද 15% සිට 18% දක්වා ඉහළ යයි.

ලංකා ඛනිජ තෙල් නීතිගත සංස්ථාවේ සභාපති සාලිය වික්‍රමසූරිය අවධාරණය කළේ, ඛනිජ තෙල් නීතිගත සංස්ථාව විසින් සිතිය හැකි සියලුම බදු ඇතුළත් වන පරිදි, අමාත්‍යංශයට මිල ගණන් පිළිබඳ තොරතුරු නිතිපතා ලබාදෙන බවයි.

ප්‍රතිපත්තිමය සළකා බැලීම් තුළින් වැට් බද්දේ බලපෑම අවම කිරීම සඳහා වූ ක්‍රියාමාර්ග සඳහා සංස්ථාව පෙනීසිටි බව සභාපතිවරයා සඳහන් කරයි.

ඉන්දියන් ඔයිල් කෝපරේෂන්හි අනුබද්ධිත සමාගම වන ලංකා IOC සහ සිනොපෙක් ද සංස්ථා මිල ගණන්වලට අනුකූලව ඔවුන්ගේ මිල ගණන් සංශෝධනය කිරීමට නියමිතය.

මේ අතර, ඉන්ධන මිල ඉහළයෑම හේතුවෙන් විවිධ භාණ්ඩ හා සේවාවල මිල ගණන් ඉහළ යෑමේ රැල්ලක් ඇති විය හැකි බවට බලශක්ති වෘත්තීය සමිතියේ කැඳවුම්කරු ආනන්ද පාලිත සඳහන් කළේය.

ඉන්ධන අලෙවියේ සැළකිව යුතු පහත වැටීමක් ඉස්මතු කරමින් මධ්‍යම පන්තියට ඇති අහිතකර බලපෑම ද ඔහු පෙන්වා දුන්නේය.

ඉදිරි මාස දෙක සඳහා ප්‍රමාණවත් තොග තිබුණද ජනවාරි මාසයේ සිට විකුණුම් තවදුරටත් පහත වැටෙනු ඇතැයි අපේක්ෂා කරන බව ද ඔහු පැවසීය.(Sunday Morning)