දුම් කොළයක් සිය නිල තොප්පියේ සඟවාගෙන වාරියපොළ බන්ධනාගාරයට ඇතුළුවීමට උත්සාහ කළ බව කියන එම බන්ධනාගාරයේ නියාමකවරයකු බන්ධනාගාර නිලධාරීන් සැකපිට පෙරේදා (17) අත්අඩංගුවට ගෙන ඇත.

සැකකාර බන්ධනාගාරයේ නියාමකවරයා දහවල් ආහාරය ගෙන යළි බන්ධනාගාරයට ඇතුළුවීමට පැමිණි අවස්ථාවේ ඔහු සෝදිසියකට ලක්කර ඇති අතර, නියමකවරයාගේ නිල තොප්පියේ සඟවා තිබූ දුම්කොළය එහිදී සොයාගැනීමට හැකි වී ඇතැයි වාර්තා සඳහන්කරයි.

දුම්කොළවලට බන්ධනාගාරයේ ඉහළ ඉල්ලුමක් තිබෙන බැවින් ඇතැම් රැදවියන්ට විකිණීමට සැකකරු මෙම දුම්කොළය රැගෙන යන්නට උත්සාහ කරන්නට ඇති බව බන්ධනාගාර නිලධාරීහු සැකකරති.

සැකකාර බන්ධනාගාරයේ නියාමකවරයා කෑගල්ල ප්‍රදේශයේ පදිංචිකරුවෙකි.

වාරියපොළ බන්ධනාගාරයේ බලධාරීහු සැකකරු සම්බන්ධයෙන් පරීක්ෂණ පවත්වති.(ලංකාදීප)