නිවාස හා නාගරික සංවර්ධන ඇමැති ප්‍රසන්න රණතුංග, 2015 සිට 2019 දක්වා තම අමාත්‍යාංශයේ නිවාස ණය අනවසරයෙන් ලබාදීම සම්බන්ධයෙන් පරීක්ෂණයක් පවත්වන ලෙස නියෝග කර තිබේ.

“හම්බන්තොට දිස්ත්‍රික්කයේ වැඩිපුරම අනවසර ණය දීම සිදුකර ඇත” යැයි ඇමැතිවරයා පවසයි.

මේ සම්බන්ධයෙන් අමාත්‍යාංශයේ නිල නිවේදනයක් නිකුත් කරමින් පවසන්නේ ඇතැම් නිවාස යෝජනා ක්‍රම සඳහා වෙන්කළ මුදල් වරින්වර වෙනත් නිවාස යෝජනා ක්‍රම කිහිපයකට මාරුකර ඇති බවයි.

මේ අතර, අතරමග නවතා ඇති නිවාස 98,000ක ඉදිකිරීම් කටයුතු අමාත්‍යාංශය විසින් ආරම්භ කිරීමට නියමිතය. 2015 පාලන සමයේදී උඩගම නිවාස ව්‍යාපෘතියේ නිවාස 2,150ක වැඩ නතර කර ඇති බව සොයාගෙන ඇත.

මේ අතර, ශ්‍රී ලංකා පොදුජන පෙරමුණ රජය බලයට පත්වීමෙන් පසු නිවාස 2,795 ක වැඩ සම්පූර්ණයෙන්ම අවසන් කර ඇති නමුත් කොවිඩ් -19 වසංගතය හේතුවෙන් අනෙකුත් නිවාසවල වැඩ නිම කිරීමට නොහැකිවී ඇති බවද අමාත්‍යාංශය වැඩිදුරටත් පවසයි.