ටෙස්ලා සමාගම සිය ස්වයංක්‍රීය නියමු විශේෂාංගය(Autopilot) භාවිතය සීමාකිරීමේ අරමුණින් එක්සත් ජනපදයේ ධාවනයට එක්කර ඇති මිලියන 02කට ආසන්න මෝටර් රථ සියල්ල ආපසු කැඳවීමට පියවර ගෙන තිබේ.

ඊට හේතුව වී ඇත්තේ එම විශේෂාංගය එක්කර තිබූ රථ 1,000කින් පමණ අනතුරු වාර්තාවීමයි.

ඒ අනුව, එක්සත් ජනපද ආරක්ෂක නියාමකයන් විසින් වසර දෙකක කාලයක් මේ සම්බන්ධ පරීක්ෂණ සිදුකර තිබිණි.

මෙම සීමාකිරීම හේතුවෙන් ඔටෝ පයිලට් විශේෂාංගය වෙනුවෙන් අමතර මුදලක් ගෙවීමට කැමති ගැනුම්කරුවන්ට තම වාහන අලෙවි කිරීමට ටෙස්ලා සමාගමට දරන උත්සාහයට පහරක් එල්ලවී තිබේ.

එක්සත් ජනපද ජාතික මහාමාර්ග රථවාහන ආරක්ෂණ පරිපාලනය පැවසුවේ, ස්වයංක්‍රීය නියමු පද්ධතිය මඟින් රියදුරන්ට ව්‍යාජ ආරක්‍ෂාව පිළිබඳ හැඟීමක් ලබාදිය හැකි අතර, ටෙස්ලා තාක්‍ෂණයට ආරක්ෂිතව මාර්ගයේ සැරිසැරීමට නොහැකි වන ඇතැම් අනතුරුදායක අවස්ථාවන්හිදී පහසුවෙන් අනිසි ලෙස භාවිත කළ හැකි බවයි.

නවමෘදුකාංග යාවත්කාලීන කිරීම යටතේ ටෙස්ලා රියදුරන් ඔටෝ පයිලට්හි “ඔටෝස්ටියර්”(Autosteer) ක්‍රියාකාරිත්වය සක්‍රිය කරන අවස්ථාවල රියදුරා මාර්ගයට අවධානය යොමු නොකරන්නේ නම් තවත් අනතුරු ඇඟවීම් ලබාදෙනු ඇත.

එක්සත් ජනපද ජාතික මහාමාර්ග රථවාහන ආරක්ෂණ පරිපාලනයේ ප්‍රකාශයකට අනුව, එම දැනුම්දීම් රියදුරන්ට සුක්කානම මත අත් තබාගෙන මාර්ගය කෙරෙහි අවධානය යොමුකරන ලෙස මතක්කර දීමකි.

මෝටර් රථ නැවත කැඳවීමෙන් පසුව පරීක්ෂා කිරීම් කිහිපයකට යටත් කිරීමට නියමිතය.

ඔටෝ ස්ටියර් සක්‍රියකර ඇති අවස්ථාවක රියදුරුගේ අවධානයේ මට්ටම ගැන පරීක්ෂා කරමින් රියදුරු අවධානය යොමුනොකරන බව මෘදුකාංගය තීරණය කරන විට, මෝටර් රථය මාර්ග තදබදය පාලනය කිරීමට ළඟාවන විට හෝ මෝටර් රථය පැදවීමට ඔටෝ ස්ටියර් පමණක් ප්‍රමාණවත් නොවන බව හැඟෙන විට විශේෂාංගය විසන්ධි කළ හැකි ආකාරය පරීක්ෂා කෙරෙනු ඇත.

මෙම නැවත කැඳවීමේ පියවර එක්සත් ජනපද ජාතික මහාමාර්ග රථවාහන ආරක්ෂණ පරිපාලනය විසින් ටෙස්ලා වෙත යවන ලද ලිපියකින් හෙළිදරව් වී තිබේ.

අඟහරුවාදා සිට ආරම්භ වන මෘදුකාංග යාවත්කාලීන කිරීම යටතේ මෙම පරීක්ෂණ සිදුකිරීමට ටෙස්ලා එකඟ වී ඇති අතර විශේෂාංගය ක්‍රියාත්මකව තිබියදී මෝටර් රථය රියදුරෙකු රථය නැවත නැවතත් පාලනය කිරීමට සූදානම් බව පෙන්වීමට අපොහොසත් වුවහොත් Autosteer විශේෂාංගය භාවිතය සීමා කරනු ඇත.

කෙසේවෙතත් ටෙස්ලා සමාගම එහි “පූර්ණ ස්වයං රිය පැදවීම” ලෙස හඳුන්වන විශේෂාංගය ප්‍රවර්ධනය කරන්නේ මිනිසුන් විසින් පමණක් ක්‍රියාත්මක කරවන මෝටර් රථවලට වඩා මෙම ස්වයංක්‍රීය රිය පැදවීම ආරක්ෂිත බව අවධාරණය කරමිනි.

එහෙත් එක්සත් ජනපද ජාතික මහාමාර්ග රථවාහන ආරක්ෂණ පරිපාලනය වසර දෙකකට වැඩි කාලයක් ඔටෝ පයිලට් සහ එහි ඔටෝ ස්ටියර් ක්‍රියාකාරිත්වය සම්බන්ධ අනතුරු පිළිබඳ වාර්තා අධ්‍යයනය කරමින් සිටී.

මෙම නැවත කැඳවීම පැමිණෙන්නේ වොෂින්ටන් පෝස්ට් විසින් සවිස්තරාත්මක පරීක්ෂණයක් ප්‍රකාශයට පත්කිරීමෙන් දින දෙකකට පසුවය.

එහිදී අවම වශයෙන් බරපතළ අනතුරු අටක් සොයාගත් අතර ඇතැම් මාරක සිදුවීම් ස්වයංක්‍රීය නියමු විශේෂාංගය ක්‍රියාත්මක නොකළ යුතුව තිබූ තත්ත්වයන් යටතේ සිදුවී තිබිණි.

ටෙස්ලා සමාගම සිය අත්පොත(manual) මගින් පවසන්නේ “Autosteer” භාවිතය මගින් අදහස් කෙරෙන්නේ සම්පූර්ණයෙන්ම අවධානයෙන් සිටින රියදුරකු සමඟ අධිවේගී මාර්ගවල සහ සීමිත ප්‍රවේශ මාර්ගවල පමණක් භාවිතයට එය සුදුසු බවයි.

කෙසේවෙතත්,එක්සත් ජනපද ජාතික මහාමාර්ග රථවාහන ආරක්ෂණ පරිපාලනයේ පරීක්ෂණයකින්, පසුගිය වසර කිහිපය තුළ බොහෝ අනතුරු සොයාගෙන ඇති අතර, එමඟින් මෙම විශේෂාංග “ස්වයංක්‍රීය නියමු” සහ “සම්පූර්ණ ස්වයංක්‍රීය රිය පැදවීම” යන නම්වලට අනුකූල නොවන බව යෝජනා කර තිබේ.

ඔවුන් ටෙස්ලා වෙත යොමුකළ සිය ලිපියේ සඳහන් කර ඇත්තේ, ඇතැම් තත්ත්වයන් තුළ ඔටෝස්ටියර් නියැලී සිටින විට, රියදුරු වැරදි ලෙස භාවිත කිරීම වැළැක්වීමට විශේෂාංගයේ පාලනවල ප්‍රමුඛත්වය සහ විෂය පථය ප්‍රමාණවත් නොවිය හැකි සහ මෝටර් රථය අනතුරකට ලක්වීමේ අවදානම වැඩිවිය හැකි බවයි.

මෘදුකාංග යාවත්කාලීන කිරීම්වලට අමතරව, ටෙස්ලා විසින් මෝටර් රථ හිමිකරුවන්ට සංශෝධන පිළිබඳ දන්වා ලිපි තැපැල් කරනු ඇත.