දිවයින පුරා පසුගියදා සිදු වූ විදුලිය බිඳවැටීමට හේතුව සොයාබැලීම සඳහා පරීක්ෂණයක් ක්‍රියාත්මක බව විදුලිබල හා බලශක්ති ඇමැති කාංචන විජේසේකර පවසයි.

පසුගිය සෙනසුරාදා දිවයින පුරා සිදු වූ විදුලිය ඇනහිටීමට හේතුව පිළිබඳ කරුණු සාකච්ඡා කිරීමට තමන් සඳුදා (දෙසැ 11) ලංකා විදුලිබල මණ්ඩලයේ පද්ධති පාලන මැදිරියට ගිය බව ට්විටර් (X) සටහනකින් ඇමැතිවරයා සඳහන් කර ඇත.

“පද්ධති පාලන ඉංජිනේරුවන් සහ නිලධාරීන් විදුලිය විසන්ධිවීමට තුඩුදුන් සිදුවීම් සහ විදුලිය යථා තත්ත්වයට පත්කිරීමට ගත් පියවර ඉදිරිපත් කළා,” යැයි ඔහු පවසයි.

විදුලිය විසන්ධිවීමට නිශ්චිත හේතු සොයාබැලීම සහ සත්‍යාපනය කිරීම සඳහා පරීක්ෂණ සිදුවෙමින් පවතින බව ඇමැතිවරයා වැඩිදුරටත් සඳහන් කරයි.

අනාගතයේදී සිදුවන අවහිරතා මඟහරවා ගැනීම සඳහා පද්ධති පාලනය සහ විමර්ශන නිර්දේශ ක්‍රියාත්මක කරන ලෙස ලංකා විදුලිබල මණ්ඩල කළමනාකාරීත්වයට උපදෙස් දුන් බවද ඔහු වැඩිදුරටත් පවසයි.