බැංකුවේ ගනුදෙනුකරුවකුගෙන් රුපියල් මිලියන 77.98ක් වංචා කළැයි කියන සිද්ධියක් සම්බන්ධයෙන් තලාහේන ශාඛාවට අනුයුක්තව සේවය කළ සම්පත් බැංකුවේ හිටපු නිලධාරීන් පස්දෙනකුට කඩුවෙල මහේස්ත්‍රාත් අධිකරණය අද විදෙස් ගමන් තහනම් කළේය.

සම්මානලාභී පාරම්පරික වෛද්‍යවරයකු වන කැළුම් හර්ෂ කමල් වීරසිංහගේ (බැංකු ගිණුම් හිමියාගේ) අවසරයකින් තොරව රුපියල් මිලියන 77.98ක මුදලක් වංචනික ලෙස වංචා කර ඇති බවට කරන ලද පැමිණිල්ලකට අනුව අධිකරණය මෙම නියෝගය නිකුත් කළේය.

සම්පත් බැංකුවේ තලාහේන ශාඛාවේ සිදුවූ බව කියන මහා පරිමාණ මූල්‍ය වංචාවක් සම්බන්ධයෙන් අපරාධ පරීක්ෂණ දෙපාර්තමේන්තුව මීට පෙර කඩුවෙල මහේස්ත්‍රාත් අධිකරණයට වෝහාරික විගණන වාර්තාවක් ඉදිරිපත් කර තිබිණි.

අපරාධ පරීක්ෂණ දෙපාර්තමේන්තුවේ ඉල්ලීම අනුව, ලක්නා ජයසේකර (පළමු නිලධාරි), තනුජා මුතුකුමාරණ (හිටපු කළමනාකාරිනිය), අරුණ ජිනදාස (හිටපු ප්‍රාදේශීය කළමණාකරු), ගයනි විධානපතිරණගේ (ලිපිකරු) සහ හිරන්ත කොඩිකාර (ශාඛා ණය නිලධාරී) යන බැංකු නිලධාරීන් පස්දෙනාට අධිකරණය මෙලෙස විදේශ ගමන් තහනම් කළේය.

පැමිණිල්ල වෙනුවෙන් ජනාධිපති නීතිඥ උපුල් ජයසූරිය නීතිඥ සචින්ත රුද්‍රිගු සමඟ පෙනීසිටියහ.