ශ්‍රී ලංකාවේ විදේශ ඇමැති අලි සබ්රි ශ්‍රී ලංකාවේ මානව හිමිකම් සම්බන්ධයෙන් ඇතැම් බටහිර ජාතීන් ගන්නා ස්ථාවරය විවේචනය කළ අතර, දේශපාලන හේතූන් මත දෙබිඩි පිළිවෙතක් අනුගමනය කරන බවට ඔවුන්ට දොස් පැවැරීය.

විදේශ කටයුතු ඇමැති ජනාධිපති නීතිඥ අලි සබ්‍රි මේ බව සඳහන් කළේ, ‘ස්ථාවර රටකට සැවොම එක මඟකට’ මැයෙන් ඊයේ (08) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි

2009 දී අවසන් වූ 26 වසරක සිවිල් ගැටුමේ අවසන් අදියරේදී සිය හමුදාව යුද අපරාධ සිදුකළ බවට එල්ල වන චෝදනා මධ්‍යයේ, ශ්‍රී ලංකාව එක්සත් ජාතීන්ගේ මානව හිමිකම් කවුන්සිලය (UNHRC) හරහා රටේ මානව හිමිකම් වාර්තා සම්බන්ධයෙන් අන්තර්ජාතික පරීක්ෂණයකට මුහුණ දී සිටී.

යුද්ධයෙන් පසුව ශ්‍රී ලංකාවේ බලයට පැමිණි ආණ්ඩු අන්තර්ජාතික පරීක්ෂණවලට විරුද්ධ වී ඇතත්, එක්සත් ජනපදය, බ්‍රිතාන්‍යය, සහ කැනඩාව ඇතුළු බටහිර ජාතීන් විසින් ප්‍රමුඛ කොටගත් යෝජනා නැවත නැවත ඉදිරිපත් කිරීම නිසා, සුළුතර දෙමළ ජාතිකයන්ගේ ඩයස්පෝරාවේ බලපෑම් සහිතව, එක්සත් ජාතීන්ගේ මානව හිමිකම් කවුන්සිලය බාහිර පරීක්ෂණයක් සඳහා නියෝග කිරීමට පියවර ගෙන ඇත.

“අපේ රටේ මිනිසුන්ගේ මානව හිමිකම් ගැන අපි සොයාබැලිය යුතුයි. ඔවුන්ට (බටහිර රටවලට) ඔවුන්ගේ රටවලට තිබෙන මානව හිමිකම් මොනවාද?” මානව හිමිකම් සම්බන්ධයෙන් ශ්‍රී ලංකාව විදේශ රටවල් සමඟ ගැටෙන්නේ මන්දැයි ඔහුගෙන් ප්‍රශ්න කළ අවස්ථාවේදී, ඇමැති සබ්රි කොළඹදී ජනමාධ්‍යවේදීන්ගෙන් විමසා සිටියේය.

“ගාසා තීරයේ මිනිසුන් 16,000ක් මරාදමා තිබෙනවා. ඔවුන් එය නවත්වන්න කියන්නෙ නැහැ නේද? ඒ සඳහා අරමුදල් සපයා ආයුධ සපයනවා. අපි ඔවුන්ගේ දෙබිඩි පිළිවෙත් පිළිගන්නේ නැහැ. නමුත් අපි අපේ ජනතාවට ගෞරවයෙන් සැළකිව යුතුයි.” ඔහු වැඩිදුරටත් සඳහන් කළේය.