‘හරක් කටා’ සහ ‘කුඩු සලිඳු’ යන කුප්‍රකට පාතාල නායකයන් දෙදෙනා තවත් දින 90ක් රඳවා තබාගැනීමට ආරක්ෂක අමාත්‍යංශය අපරාධ පරීක්ෂණ දෙපාර්තමේන්තුවට අවසර ලබා දී තිබේ.

අපරාධ පරීක්ෂණ දෙපාර්තමේන්තුව මේ බව කොළඹ කොටුව මහේස්ත්‍රාත් අධිකරණයට දන්වා ඇත.

‘හරක් කටා’ රැඳවුම් නියෝග මත රඳවා තබාගැනීමට ඔහුට එරෙහි සාක්ෂි ප්‍රමාණවත් නොවන්නේ නම් සුදුසු මහේස්ත්‍රාත් අධිකරණයකට ඉදිරිපත් කරන ලෙස අභියාචනාධිකරණය දෙසැම්බර් 06 වැනිදා අපරාධ පරීක්ෂණ දෙපාර්තමේන්තුවට නියෝග කළේය.

නදුන් චින්තක වික්‍රමරත්න නොහොත් ‘හරක් කටා’ සහ ඔහුගේ කුප්‍රකට සහචරයා වන සලිඳු මල්ෂික නොහොත් ‘කුඩු සලිඳු’ මෙම වසරේ මාර්තු මස 01 වැනිදා මැඩගස්කරයේ දී අත්අඩංගුවට ගනු ලැබුවේ එරට නීතිය බලගැන්වීමේ බලධාරීන්, ඉන්ටර්පෝල් සහ රේගු නිලධාරීන් එක්ව කළ මෙහෙයුමකදීය.

ශ්‍රී ලාංකික පාතාල නායකයන් දෙදෙනා ඇතුළු සැකකරුවන් 8 දෙනෙකු අත්අඩංගුවට ගත් බව මැඩගස්කර ආරක්ෂක නිලධාරීන් ශ්‍රී ලංකා විදේශ අමාත්‍යංශයට දැනුම් දීමෙන් පසු ඔවුන් දෙදෙනා මාර්තු 15 වැනි දින නැවත දිවයිනට ගෙන එන ලදී.

ශ්‍රී ලංකාවට මැඩගස්කරයේ තානාපති කාර්යාලයක් හෝ මහ කොමසාරිස් කාර්යාලයක් නොමැති බැවින් පිටුවහල් කිරීමේ ක්‍රියාවලිය සම්බන්ධීකරණය කර ඇත්තේ සීෂෙල්ස් – වික්ටෝරියාහි ශ්‍රී ලංකා මහ කොමසාරිස් කාර්යාලය විසිනි.

ඔවුන් පිටුවහල් කිරීමෙන් පසුව, ආරක්ෂක අමාත්‍යංශය විසින් ත්‍රස්තවාදය වැළැක්වීමේ පනත යටතේ මොවුන් දෙදෙනා රඳවා තබාගැනීමට මූළික දින 90ක නියෝගයක් නිකුත් කරන ලදී.

ඩුබායි, මැලේසියාව, සිංගප්පූරුව, සීෂෙල්ස්, මාලදිවයින සහ මැඩගස්කරය යන රටවල මත්ද්‍රව්‍ය ජාවාරම් මෙහෙයවන ‘හරක් කටා’ මිනීමැරුම් සහ මංකොල්ලකෑම් මෙන්ම අන්තර්ජාතික මත්ද්‍රව්‍ය ජාවාරම් රැසකට සම්බන්ධ බවට අවශ්‍යව සිට ඇත.

මේ අතර, ‘කුඩු සලිඳු’ට අවම වශයෙන් මිනීමැරුම් 09ක් සැලසුම් කළ බවටත්, තවත් හතරදෙනකුට මාරාන්තික තුවාල සිදුකළ බවටත් චෝදනා එල්ල වේ.

අපරාධ පරීක්ෂණ දෙපාර්තමේන්තුව භාරයේ රඳවාගෙන සිටියදී, ‘හරක් කටා’ සැප්තැම්බර් මාසයේදී එම පරිශ්‍රයෙන් පළායෑමට උත්සාහ කළ අතර, අවසානයේ එම උත්සාහය නිලධාරීන් විසින් ව්‍යර්ථ කරන ලදී.

මෙම පාතාල නායකයාගේ පළායෑමට ආධාර අනුබල දුන් සහ අද දක්වා සැඟවී සිටින පොලිස් කොස්තාපල්වරයා පිළිබඳ ඔත්තුවක් සඳහා පොලිසිය විසින් රුපියල් මිලියන 2.5ක මුදල් ත්‍යාගයක් පිරිනැමීමට කටයුතු යොදා තිබේ.

මේ වන විට ‘හරක් කටා’ පළායෑමට ගත් උත්සාහය අසාර්ථක වීම සම්බන්ධයෙන් ඉහත කී කොස්තාපල්වරයාගේ මව සහ මස්සිනා, තවත් පොලිස් නිලධාරියකු සහ ශ්‍රී ලංකා යුද හමුදාවේ හිටපු ස්නයිපර් වෙඩික්කරුවකු අත්අඩංගුවට ගෙන ඇත.