ඔන්ලයින් අර්ධ කාලීන රැකියා ලබාදෙන බව පවසා ඉන්දියාවේ තොරතුරු තාක්ෂණ වෘත්තිකයකුගෙන් ඉන්දීය රුපියල් ලක්ෂ 60 ක් (ආසන්න වශයෙන් ශ්‍රී ලංකා රුපියල් මිලියන 23.5 ක්) වංචා කළ බව කියන ශ්‍රී ලාංකිකයකු ඉන්දියාවේ කූඩලෝර් පොලිසියේ සයිබර් අපරාධ අංශය විසින් අත්අඩංගුවට ගෙන තිබේ.

එම සයිබර් අපරාධ පොලිසියට අනුව ඉන්දියාවේ කුරුංජිපාඩිහි 32 හැවිරිදි එස්.සම්පත් නමැති පැමිණිලිකරුට ටෙලිග්‍රෑම් ඇප් එක හරහා මාර්ගගත අර්ධකාලීන රැකියාවක් ලබා දෙන බවට පණිවිඩයක් ලැබී ඇත.

නාඳුනන පුද්ගලයකු විසින් අන්තර්ජාලය හරහා යම් යම් කාර්යයන් සම්පූර්ණ කිරීම සඳහා මුදල් ලබා දෙන බවට ඔහුව රවටා තිබේ.

යෙදුම සමාලෝචනය කිරීම සඳහා කුඩා ආයෝජනයක් වෙනුවෙන් සම්පත්ට හොඳ ප්‍රතිලාභයක් පොරොන්දු වී ඇත.

පසුව සම්පත් විශාල ටෙලිග්‍රෑම් කණ්ඩායමකට ගෙනයන ලද අතර එහිදී ඔහු දිගටම කාර්යයන් ඉටුකර බැංකු ගිණුමකට රුපියල් ලක්ෂ 60ක මුදලක් ලබාගෙන ඇත.

අවසානයේදී ඔහුගේ එම මුදල් වංචාකරුවන්ට හිමි වූ අතර, ඒ අනුව ඔහු සයිබර් අපරාධ පොලිසියට පැමිණිලි කළේය.

පොලිස් අධිකාරී ආර්.රාජාරාම්ගේ උපදෙස් මත සයිබර් අපරාධ අංශය මගින් පුළුල් විමර්ශනයක් සිදුකර තිබේ.

කණ්ඩායම ගිණුම් හිමියෙකුට සිදු කරන ලද රුපියල් ලක්ෂ 6ක අවසන් ගනුදෙනුව සොයා ගත් අතර සැක සහිත බැංකු ගිණුමේ ගිණුම් හිමියාගේ තොරතුරු ලබාගෙන ඇත.

ගිණුම් හිමියාගේ විස්තර සහ සම්බන්ධිත ජංගම දුරකථන අංකය බැංකුවෙන් ලබාගැනීමට ද කටයුතු කර ඇත.

එම ගිණුම චෙන්නායි – අම්බතූර්හි පදිංචි ශ්‍රී ලාංකිකයෙකු වන 26 හැවිරිදි සල්මන් මොහොමඩ් ෆාරුක්ට අයත් එකක් බව සොයා ගන්නා ලදී.

ඔන්ලයින් වංචාවේ ප්‍රධානියා චීනයෙන් පැමිණි අයකු බව පොලිසිය පවසයි.

අඟහරුවාදා චෙන්නායිහිදී සල්මාන් අත්අඩංගුවට ගත් පොලිසිය ඔහුව කූඩලෝර් වෙත රැගෙන ආවේය.

ඔහු ප්‍රාදේශීය අධිකරණයට ඉදිරිපත් කිරීමෙන් පසු රක්ෂිත බන්ධනාගාරගත කර කූඩලෝර් මධ්‍යම බන්ධනාගාරයට යවා ඇත.