නාවලපිටිය රඹුක්පිටිය මහා විද්‍යාලයේ විදුහල්පතිවරයා විසින් පොලිතින් සහ පුවත්පත් කෑමට බලකළ බව කියන සිසුන් දෙදෙනකු නාවලපිටිය දිස්ත්‍රික් මහ රෝහලට ඇතුළත් කර තිබේ.

සිසුන්ගේ දිවා ආහාර විවේකයේදී සිසුන් 33 දෙනකුගෙන් යුත් පන්තියක මෙම සිද්ධිය සිදුවී ඇති අතර, ඔවුන්ගෙන් හත්දෙනකු පොලිතින් සහ පුවත්පත් පිටුවල ඔතා ඔවුන්ගේ ආහාර රැගෙන පැමිණ ඇත.

මෙම සිසුන් හත්දෙනා පාසල් බෑගයට පොලිතින් දමාගන්නට සැරසෙද්දී විදුහල්පතිවරයා මැදිහත් වී එම පොලිතින් සහ පුවත්පත් පිටු එම ස්ථානයේදීම ආහාරයට ගන්නා ලෙස සිසුන්ට නියෝග කළ බව සිද්ධිය ඇසින් දුටුවන් වාර්තා කර ඇත.

අන් කිසිවක් කරගත නොහැනි සිසුන් විදුහල්පතිවරයාගේ අණ පිළිපදිමින් මෙම හානිකර ද්‍රව්‍ය අනුභව කර ඇත.

එහිදී පොලිතින් සහ පුවත්පත් ආහාරයට ගත් හත්දෙනා අතරින් 21 හැවිරිදි සහ 22 හැවිරිදි සිසුන් දෙදෙනකු පසුව ඔවුන්ගේ මාපියන් විසින් නාවලපිටිය දිස්ත්‍රික් මහ රෝහලට ඇතුළත් කර තිබේ.

සිද්ධිය සම්බන්ධයෙන් රෝහල්ගතව සිටින එක් සිසුවෙකුගේ පියා විසින් කරන ලද පැමිණිල්ලකට අනුව නාවලපිටිය පොලිසිය පරීක්ෂණයක් ආරම්භ කර ඇත.