ලංකා දුම්කොළ සමාගම (CTC) විසින් බෙදා හරින ලද රසකාරක අන්තර්ගත කරන ලද සිගරට් නිෂ්පාදන වර්ග තුනක් විකිණීම වහාම ක්‍රියාත්මක වන පරිදි නවතා ඇත.

ඒ අනුව Dunhill Switch, Dunhill Double Capsule සහ John Player Gold Pro Cool සිගරට් අලෙවිය නතර කර තිබෙනවා.

නොවැම්බර් 17 වැනිදා සිට ක්‍රියාත්මක වන පරිදි මෙම පියවර ගෙන ඇත.

දුම්කොළ සහ මධ්‍යසාර පිළිබඳ ජාතික අධිකාරිය (NATA) විසින් 1982 (33) ගැසට් නිවේදනයට අනුව 2016 සැප්තැම්බර් 01වැනි දින නඩුවක් ගොනුකරන ලදී.

මේ අතර, මෙම දුම්වැටි අලෙවිය වහා නතර කරන ලෙසත්, මෙම දුම්වැටි පැකට් කඩවල පාරිභෝගිකයන් වෙත ප්‍රදර්ශනය කළහොත් ඉවත් කරන ලෙසත් ලංකා දුම්කොළ සමාගම සිය සිල්ලර වෙළෙඳුන්ට දන්වා ඇති බව වාර්තා විය.

NATA පනතට අනුව, 2006 අංක 27 දරන දුම්කොළ හා මධ්‍යසාර පිළිබඳ ජාතික අධිකාරී පනතේ 33 වැනි වගන්තිය සමඟින් කියවා ඇති 30 වැනි වගන්තිය යටතේ රෙගුලාසි හඳුන්වාදී ඇත.

එම ගැසට් පත්‍රයට අනුව දුම් රහිත දුම්කොළ නිෂ්පාදන හෝ දුම්කොළ අඩංගු ඕනෑම රස, වර්ණ හෝ පැණිරස සිගරට් හෝ දුම්කොළ අඩංගු ඕනෑම ඉලෙක්ට්‍රොනික සිගරට් අලෙවිය තහනම් වේ.

මේ අතර, විපක්ෂ නායක සජිත් ප්‍රේමදාස ඊයේ පාර්ලිමේන්තුවේදී ප්‍රකාශ කළේ, එකී රසකාරක දුම්කොළ ද්‍රව්‍ය අලෙවිය සහ බෙදාහැරීම අත්හිටුවීම සම්බන්ධයෙන් NATA ආයතනය පවරා තිබූ නඩු සම්බන්ධයෙන් අභියාචනාධිකරණය සිය තීන්දුව ප්‍රකාශයට පත්කළ බවයි.