Celebrity Cruises සේවාව විසින් මෙහෙයවනු ලබන ‘Celebrity Edge’ නම් දැවැන්ත සුඛෝපභෝගී සංචාරක මගී නෞකාව ඉන්දියාවේ කොචි සිට කොළඹ බලා අද යාත්‍රාකරයි.

එය එක්සත් ජනපදය, ඕස්ට්‍රේලියාව සහ කැනඩාව යන රටවල සංචාරකයන්  2,780ක් සහ කාර්ය මණ්ඩල සාමාජිකයින් 1,273කින් සමන්විතය.

මීටර් 306ක් දිග නෞකාව තට්ටු 15කින් සහ නවීන පහසුකම් රැසකින් සමන්විත වේ.

නොවැම්බර් 13 වැනිදා ඩුබායි සිට යාත්‍රා කර නොවැම්බර් 16 වැනිදා මුම්බායි නැව් තටාකය වෙත පැමිණි ‘Celebrity Edge’ එහි දින 12 ක ගමනේ කොටසක් ලෙස තායිලන්තයේ ෆුකෙට් වෙත යාත්‍රාකිරීමට නියමිතය.

අවසාන ගමනාන්තය වන්නේ සිංගප්පූරුව වන අතර, ගමන නොවැම්බර් 25 වැනිදා අවසන් වේ.

‘Celebrity Edge’ මෙහෙයවනු ලබන්නේ Celebrity Cruise විසින් වන අතර එය සුප්‍රසිද්ධ සංචාරක කෲස් ලයින් සන්නාමය වන Royal Caribbean Cruise යටතේ වන සමාගමකි.

මෙහි විශාලතම ආකර්ෂණය වන්නේ නැවක් මත සකස් කරන ලද ලොව ප්‍රථම කැන්ටිලිවර් පාවෙන වේදිකාව වන ‘මැජික් කාපට්’ අංගයයි.

එම විනෝදාස්වාද වේදිකාව මුහුද සහ අහස අතර තට්ටු 13ක ගොඩනැගිල්ලක උසින් සමන්විත වන අතර එය ජල මට්ටම දක්වාද හෙළීමේ හැකියාව තිබේ.