November 18, 2023
සෞඛ්‍ය අමාත්‍යංශයේ ලේකම් ජනක ශ්‍රී චන්ද්‍රගුප්ත විශ්‍රාමයෑම හේතුවෙන් ඔහුගේ සේවා කාලය අදින් අවසන් වන අතර, එම තනතුර පුරප්පාඩුවීමත් සමග තනතුර වෙනුවෙන් දැඩි තරගකාරීත්වයක් මතුවී තිබෙන බව වාර්තා වේ.
අමාත්‍යංශ අභ්‍යන්තර ආරංචිමාර්ග පෙන්වාදෙන්නේ ජනක ශ්‍රී චන්ද්‍රගුප්ත නීතිවිරෝධී ඉමියුනොග්ලොබියුලින් එන්නත් ගනුදෙනුවකට සම්බන්ධ බවට චෝදනා එල්ලවීම හේතුවෙන් ඔහුට සේවා දිගුවක් ලබානොදෙන බවයි.
මෙම තත්ත්වය හමුවේ සෞඛ්‍ය අමාත්‍යාංශයේ ලේකම්වරයාගේ භූමිකාව සඳහා කැපීපෙනෙන තරගයක් මතුව ඇතැයි ආරංචි මාර්ග සඳහන් කරයි.
තරගකරුවන් අතරින් අමාත්‍යංශ නිලධාරීන් පිරිසක් එම තනතුර සඳහා සුදුසුම අපේක්ෂකයා ලෙස විශේෂඥ වෛද්‍ය පාලිත මහීපාල යෝජනාකර ඇත.
වෛද්‍ය මහීපාල මීට පෙර සෞඛ්‍ය සේවා අධ්‍යක්ෂ ජනරාල්වරයා ලෙස කටයුතු කළ අතර, දේශපාලන මැදිහත්වීම් හේතුවෙන් වරින්වර ඔහුට රාජකාරි කටයුතු කරගෙන යෑමට බාධා එල්ල වූ බව වාර්තා විය.
දූෂණයෙන් හා කඩාවැටීමෙන් විනාශ වී ඇති ශ්‍රී ලංකාවේ සෞඛ්‍ය පද්ධතිය යළි නගාසිටුවීමට අවශ්‍ය නිපුණතා සහ විශේෂඥතාව වෛද්‍ය මහීපාල සතු බව එම නිලධාරීන් පිරිස සෞඛ්‍ය ඇමැතිවරයා වෙත අවධාරණය කර ඇතැයි පැවැසේ.
ඔහු විදේශගතව සේවය කර ලෝක සෞඛ්‍ය සංවිධානයේ ඉහළ තනතුරක් ලබාගැනීමටද සමත්වූවෙකි.
අමාත්‍යංශ ලේකම් තනතුර සඳහා තවත් අපේක්ෂකයෙකු වන්නේ වෛද්‍ය අනිල් ජාසිංහය.
කෙසේවෙතත්, පරිසර අමාත්‍යංශයේ ලේකම්වරයා ලෙස ඔහු දැනට දරන භූමිකාවෙන් ඉවත් කිරීමට මැලිකමක් පවතින්නේ, ඔහු ඉහළ වටිනාකමකින් යුත් ව්‍යාපෘති කිහිපයකට සම්බන්ධවීම හේතුවෙන් බව ආරංචි මාර්ග සඳහන් කරයි.
වත්මන් ලේකම්වරයා ධූරයෙන් ඉවත්ව යන විට සෞඛ්‍ය ඇමැතිවරයා නව ලේකම්වරයකු පිළිබඳ ගන්නා තීරණය ගැන පාර්ශ්වකරුවන් නොඉවසිල්ලෙන් බලා සිටින අතර, ඔවුන් අපේක්ෂා කරන්නේ වත්මන් අභියෝගවලට මුහුණදී සෞඛ්‍ය අමාත්‍යංශය නිවැරදි මගකට යොමුකිරීමට හැකි අයෙකි.
