මූල්‍ය ගනුදෙනුවක් සම්බන්ධයෙන් කාන්තාවක් ඇතුළු හයදෙනකුගෙන් යුත් කල්ලියක් විසින් පැහැරගෙන ගිය ශ්‍රී ලාංකික ව්‍යාපාරිකයකු, ශ්‍රී ලංකාවේ වෙසෙන පැහැරගැනීමට ලක්වූ පුද්ගලයාගේ දියණියගෙන් ඇමතුමක් ලැබීමෙන් පසු චෙන්නායි පොලිසිය විසින් බේරා ගෙන ඇත.

චෙන්නායි නගරයේ පොලිස් පාලක මැදිරියට ශ්‍රී ලංකාවේ අර්චනා හුසේන්ගෙන් ඇමතුමක් ලැබී ඇති අතර, ඇයගේ පියාවන මොහොමඩ් ශ්‍යාම් චෙන්නායි හි ව්‍යාපාරික සංචාරයක යෙදී සිටියදී පැහැරගෙන ගොස් ඇතැයි පවසා ඇත.

පැහැරගත් පුද්ගලයාගේ ජංගම දුරකථනයෙන් පැහැරගත් අය තමාට කතාකර ඔහුව නිදහස් කිරීමට ලක්ෂ 15ක කප්පම් මුදලක් ඉල්ලා සිටි බව ඇය සඳහන් කර තිබේ.

ඔවුන්ගේ වචන විශ්වාස කළ ඇය, ඒ වන විටත් රුපියල් 95,000ක් යවා ඇතැයි අර්චනා හුසේන් පොලිසියට පවසා තිබේ.

එම පැමිණිල්ල සළකා උතුරු වෙරළ පොලිසිය පැහැරගැනීමේ විමර්ශනයක් ආරම්භ කර ඇත.

අනතුරුව පොලිස් කොමසාරිස් ටී. වීරකුමාර් ප්‍රමුඛ කණ්ඩායමක් සැකකරුවන් සහ වින්දිත මොහොමඩ් ෂියාම්ගේ ජංගම දුරකථන සංඥාව සොයාබැලීම ආරම්භ කර තිබේ.

කණ්ඩායම මන්නාඩි ප්‍රදේශයේ සැඟවී සිටි සැකකරුවන් සොයා ගොස් ශ්‍යාම්ව බේරාගෙන ඇත.

එහිදී පොලිසිය අනා නගර් හි පදිංචි කේ. චිත්‍රා (43) සහ රියාස් අස්කාර් (47), බටහිර කේ කේ නගර්හි පදිංචි ජී. වෙල්මුරුගන් (41) සහ කේ. දිනේෂ් (31) යන අය අත්අඩංගුවට ගෙන තිබේ.

ශ්‍යාම් විසින් චිත්‍රාගෙන් ලක්ෂ 05ක් ණයට ගෙන එය ආපසු නොගෙවූ බව පරීක්ෂණවලදී අනාවරණය වී ඇත.

අත්අඩංගුවට ගත් පැහැරගැනීම්කරුවන් නොවැම්බර් 11 වැනිදා ඔහු හෝටල් කාමරයෙන් පිටතට පැමිණි පසු ශ්‍යාම්ව පැහැරගෙන ගොස් තිබේ.

ඔවුන් ඔහුව විරුගම්බක්කම් ප්‍රදේශයේ නිවසක රඳවා තබාගෙන මුදල් නොගෙවන්නේ නම් නිදහස් නොකරන බවට තර්ජනය කර ඇත.

ඔහු ළඟ මුදල් නොතිබූ නිසා පැහැරගත් අය ශ්‍රී ලංකාවේ සිටින ඔහුගේ දියණියට කතාකර මුදල් ඉල්ලා තිබේ.

කොල්ලයට සම්බන්ධ තවත් සැකකරුවන් දෙදෙනකු සොයමින් සිටින බව පොලිසිය පවසයි.

අත්අඩංගුවට ගත් සිව්දෙනා මහේස්ත්‍රාත් අධිකරණයට ඉදිරිපත් කිරීමෙන් පසු රක්ෂිත බන්ධනාගාරගත කිරීමට නියමිතය.