November 8, 2023
මයික්‍රොසොෆ්ට් ආයතනයේ ආරක්ෂක බුද්ධි වාර්තාවේ 21 වැනි සංස්කරණයට අනුව, ශ්‍රී ලංකාව සයිබර් අපරාධකරුවන්ගේ සරළ ඉලක්කයක් ලෙස හඳුනාගෙන ඇති බවත්, සයිබර් අපරාධකරුවන් බිට්කොයින් වැනි ගුප්ත කේතන මුදල් වෙනුවෙන් පුද්ගලයන්ගේ පරිගණක භාවිත කරන බවත්, නීතිවිරෝධී ලාභ සොයන ක්‍රිප්ටෝ වැනි අනිෂ්ට මෘදුකාංග රට තුළ වැඩි වී තිබෙන බවත්, අන්තර්ජාල ආරක්ෂණ පනත් කෙටුම්පත පිළිබඳ ශ්‍රේෂ්ඨාධිකරණ තීරණය යටතේ දක්වා තිබේ.
එම තීරණයට අනුව, මෑත කාලීනව මෙරටින් අත්අඩංගුවට ගත් විදේශීය ජාතිකයන් 40කට ආසන්න පිරිසත් සමඟ මේ හා සබැඳි මූල්‍ය වංචා, පෞද්ගලික තොරතුරු සොරකම් සහ ඊ-වාණිජ්‍ය වංචා ඇතුළු සයිබර් අපරාධ සඳහා ඇති විදේශීය සම්බන්ධකම් පිළිබඳ හෙළිවී ඇත.
ඇතැම් විදේශීය ජාතිකයන් විවිධ රටවල පුද්ගලයන්ගේ ගිණුම්වලින් අන්තර්ජාලය හරහා රුපියල් මිලියන ගණනක මුදලක් මාස කිහිපයක් තිස්සේ වංචා කර ඇති බව පොලිසිය පවසයි.
“තානාපති කාර්යාල කිහිපයක් හරහා ලැබුණු පැමිණිලි මතයි ඔවුන් අත්අඩංගුවට ගත්තේ. එබැවින් සංචාරක වීසා මත ශ්‍රී ලංකාවට පැමිණ සිටින විදේශිකයන් අන්තර්ජාලය හරහා ශ්‍රී ලංකාව තුළ සිදුකරනු ලබන බව කියන වංචාවන් සම්බන්ධයෙන් වඩාත් විමසිලිමත් වන ලෙස නීතිය ක්‍රියාත්මක කරන බලධාරීන් මහජනතාවට අනතුරු අඟවනවා.” යැයි පොලිසිය පවසයි.
ශ්‍රේෂ්ඨාධිකරණ තීරණයට අනුව මෙවැනි අපරාධ වැළැක්වීමට සහ ජනතාව ආරක්‍ෂා කිරීමට අවශ්‍ය නීති සම්පාදනය කිරීමේ වගකීම රජයට තිබේ.
“එවැනි නීති සම්පාදනය ආණ්ඩුක්‍රම ව්‍යවස්ථාවේ 12 (එල්) වගන්තියේ දක්වා ඇති නීතියේ සමාන ආරක්ෂාව සුරක්ෂිත කරනු ඇත,” යනුවෙන් ශ්‍රේෂ්ඨාධිකරණ තීරණයෙන් පවසා ඇත.
