බස් ප්‍රමුඛතා මංතීරු නීතිය හෙට (නොවැම්බර් 01) සිට ක්‍රියාත්මක කිරීමට කටයුතු යොදා ඇති අතර, බස් රථ රියදුරන්ට එම නීතිය පිළිපැදීම සඳහා සති දෙකක කාලයක් ලබා දෙන බව පොලිසිය සඳහන් කරයි.

උදෑසන සහ සවස කාර්යාල කාර්ය බහුල වේලාවන්හිදී බස් ප්‍රමුඛතා මංතීරුව ක්‍රියාත්මක වන බව පොලිසිය පවසයි.

ඒ අනුව ගාලු පාරේ වාහන පෙරවරු 06ත් 09ත් අතර වැල්ලවත්ත සැවෝයි සිනමාහල අසලින් ප්‍රමුඛතා මංතීරුවට ඇතුළු වී ගාලු පාර හරහා කොළඹ කොටුව දෙසට ගමන් කළ යුතුය.

එමෙන්ම තවත් ප්‍රමුඛතා මංතීරුවක් පෙරවරු 06 සිට 09 දක්වා මරදාන, බොරැල්ල හන්දියේ සිට කොළඹ කොටුව ඕල්කට් මාවත දක්වා ක්‍රියාත්මක වේ.

එම මංතීරුවම පිටවීමක් ලෙස සවස 04 සිට 07 දක්වා ක්‍රියාත්මක වේ.

ප්‍රමුඛතා මංතීරුව ශ්‍රී ලංකා ගමනාගමන මණ්ඩලයේ (ශ්‍රී ලංගම) බස් රථ, පෞද්ගලික බස් රථ, පාසල් බස් රථ, පාසල් වෑන් රථ, කාර්යාල ප්‍රවාහන බස් රථ සහ වෑන් රථ වැනි වාහන ධාවනය කිරීමට ඉඩ සලසයි.

ඉහත සඳහන් කර ඇති වාහන හැර මෙම කාලය තුළ ප්‍රමුඛතා මංතීරුවට ඇතුළු වීමට අවසර නොදේ.

මේ අතර, මෙම නීතිය කඩ කරන රියදුරන්ට මෙම කාලය තුළ අනතුරු ඇඟවීම් නිකුත් කරන ලෙස රථවාහන පොලිසියට උපදෙස් දී තිබේ.