අල්ලස් හෝ දූෂණ චෝදනා විමර්ශන කොමිෂන් සභාව ඊයේ 18 කොළඹ කොටුව මහේස්ත්‍රාත් අධිකරණයට දන්වා සිටියේ, හිටපු ජනාධිපති ගෝඨාභය රාජපක්ෂ රැඳී සිටි කොළඹ ජනාධිපති මන්දිරයේ නිල කාමරයෙන් රුපියල් මිලියන 17.85ක මුදලක් සොයාගැනීමේ සිදුවීම සම්බන්ධයෙන් තවදුරටත් ඉදිරි ක්‍රියාමාර්ග නොගන්නා බවයි.

සාක්ෂි නොමැතිකම හේතුවෙන් අල්ලස් හෝ දූෂණ චෝදනා විමර්ශන කොමිෂන් සභා මෙම තීරණයට හේතු වූ අතර, එබැවින් මේ සම්බන්ධයෙන් කිසිදු පියවරක් නොගන්නා බව ප්‍රකාශ කළේය.

2022 ජුලි 09 වැනි දින මහජන අරගලකරුවන් ජනාධිපති නිල නිවසට කඩාවැදුණු අවස්ථාවේදී මෙම මුදල් සොයාගන්නා ලදී.

එම මුදල් එදින ජනාධිපති මන්දිරයේ සිටි විරෝධතාකරුවන් විසින් කොටුව පොලිසිය වෙත භාරදී ඇති අතර සති තුනකට පසුව එය කොටුව මහේස්ත්‍රාත් අධිකරණයට භාරදී ඇත.

කෙසේවෙතත් කොටුව පොලිසියේ ස්ථානාධිපතිවරයා එලෙස මුදල් භාරදීම ප්‍රමාද කළේ ඇයිද යන්න පිළිබඳව සාධාරණ සැකයක් පවතින බව පවසමින්, ඒ සම්බන්ධයෙන් පරීක්ෂණයක් පවත්වන ලෙස කොටුව මහේස්ත්‍රාත් තිළිණ ගමගේ පොලිස්පතිවරයාට නියෝග කළේය.