අන්තර්ජාතික මූල්‍ය අරමුදලේ (IMF) මාර්ගෝපදේශයන්ට අනුකූලව පිරිවැය රුපියල් මිලියන 200 ඉක්මවන්නේ නම් අදාළ වෙබ් අඩවි ඔස්සේ ප්‍රසම්පාදන දැන්වීම් පළකිරීමට දැඩි රෙගුලාසි නිකුත් කර තිබියදීත්, බොහෝ රාජ්‍ය ආයතන එම උපදෙස් පිළිපැද නොමැති බව මහා භාණ්ඩාගාරය පවසයි.

භාණ්ඩාගාරයේ රාජ්‍ය මූල්‍ය දෙපාර්තමේන්තුව විසින් නිකුත් කරන ලද චක්‍රලේඛයකට අනුව, ප්‍රසම්පාදන ක්‍රියාකාරකම්, භාණ්ඩ, වැඩ සහ සේවා ප්‍රසම්පාදනය සහ කළමනාකරණය යන ඊ-රාජ්‍ය ප්‍රසම්පාදන (e-GP) ඩිජිටල් වේදිකාව යටතේ විනිවිදභාවය සහ වගවීම සහතික කිරීම සඳහා මෙම පියවර ගෙන ඇත.

ජනතාවට තොරතුරු ලබාගත හැකි ආකාරයෙන් එම තොරතුරු රාජ්‍ය ආයතන විසින් ප්‍රසිද්ධියට පත්කර තිබිය යුතුය.

මෙලෙස ඉල්ලා සිටින තොරතුරු ප්‍රසිද්ධ කිරීමට කටයුතු කර ඇත්තේ ආයතන කිහිපයක් පමණක් බව භාණ්ඩාගාරය පවසයි.

කළින් නිකුත් කරන ලද මාර්ගෝපදේශවලට අනුව, සියලුම රාජ්‍ය ආයතන ප්‍රසම්පාදන කටයුතු සහ රුපියල් මිලියන 200 ඉක්මවන කොන්ත්‍රාත්තු ප්‍රදානය කිරීම පිළිබඳ තොරතුරු 2023 මැයි 01 වැනිදා සිට ප්‍රකාශයට පත්කළ යුතුය.

මෙම ක්‍රියාවලිය පහසු කිරීම සඳහා e-GP ද්වාරයෙහි ලියාපදිංචි වන ලෙස අදාළ ප්‍රසම්පාදන ආයතනවලින් ඉල්ලා සිටී.

රාජ්‍ය මූල්‍ය දෙපාර්තමේන්තුව මගින් ව්‍යාපෘති කමිටු සහ තාක්ෂණික ඇගයීම් කමිටු පත්කිරීමේදී ප්‍රසම්පාදන ප්‍රකාශන පිළිබඳ රෙගුලාසිවලට අනුකූලව කටයුතු කිරීම පිළිබඳව සොයාබලන බවද එම චක්‍රලේඛයේ සඳහන් වේ.