ශ්‍රී ලංකාවේ තෙල් හා ගෑස් ගවේෂණ අවස්ථා සඳහා සහභාගී වීමට තමන් උනන්දු වන බව ඉන්දියාවේ ONGC Videsh Limited (OVL) සමාගම ඊයේ නිවේදනය කළේය.

එසේම පෙට්‍රෝලියම් කර්මාන්තය සංවර්ධනය කිරීමේ මාර්ග සිතියම සහ ප්‍රතිපත්තිය ශ්‍රී ලංකාව විසින් ඉදිරිපත් කරනතුරු තමන් බලාසිටින බවද නිවේදනයක් නිකුත් කරමින් සමාගම ප්‍රකාශ කරයි.

OVL යනු ඉන්දියාවේ රජය සතු තෙල් සහ ස්වාභාවික වායු සංස්ථාවේ විදේශීය ආයෝජන අංශයයි.

OVL කළමනාකාර අධ්‍යක්ෂ රාජර්ෂි ගුප්තාට අනුව, එහි මව් සමාගමට දකුණු ඉන්දියාවේ සැළකිව යුතු වත්කම් සහ යටිතල පහසුකම් ඇති බැවින්, සමූහයේ සහයෝගීතාවෙන් ශ්‍රී ලංකාවේ තෙල් හා ගෑස් වත්කම් සම්බන්ධයෙන් ගවේෂණය කරනු ඇත.

භූ විද්‍යාත්මකව ශ්‍රී ලංකාව සහ එහි වෙරළ කලාප දකුණු ඉන්දියාවේ ප්‍රදේශ වලට බෙහෙවින් සමාන බවත්, OVL සමාගමට එවැනි පරිසරයක ගනුදෙනු කිරීම හුරුපුරුදු බවත් OVL වැඩිදුරටත් සඳහන් කර ඇත.

OVL ශ්‍රී ලංකා රජය සමග සාකච්ඡා කර තරඟකාරී ලංසු තැබීම් හෝ දිවයිනේ ඉහළ ඛණිජ තෙල් අංශයේ සහභාගීත්වය සක්‍රීය කිරීම සඳහා ශ්‍රී ලංකා රජය තීරණය කරන වෙනත් ඕනෑම මාර්ගයක් සඳහා විවෘත බව සමාගම වැඩිදුරටත් පවසා තිබේ.