October 9, 2023
නසීර් අහමඩ් ශ්‍රී ලංකා මුස්ලිම් කොංග්‍රසයෙන් නෙරපා හැරීම තහවුරු කරමින් ඔහුගේ පාර්ලිමේන්තු මන්ත්‍රී ධුරය අහෝසි කිරීම තහවුරු කළ ශ්‍රේෂ්ඨාධිකරණ තීන්දුවෙන් ධෛර්යමත් වූ ශ්‍රී ලංකා පොදුජන පෙරමුණ, සිය පක්ෂයෙන් ඉවත්වූ මන්ත්‍රීවරු 25 දෙනකුට පමණ එරෙහිව එවැනි විනය ක්‍රියාමාර්ග ගැනීම සම්බන්ධයෙන් බැරෑරුම් ලෙස සළකා බලමින් සිටින බව වාර්තා වේ.
නසීර් අහමඩ් පක්ෂයෙන් ඉවත් වී ආණ්ඩුවේ පරිසර ඇමැති ධුරය භාර ගැනීමෙන් පසු ඔහු පක්ෂයෙන් නෙරපා හැරීමට ශ්‍රී ලංකා මුස්ලිම් කොංග්‍රසය ගත් තීරණයට පක්ෂව ශ්‍රේෂ්ඨාධිකරණය තීන්දු කළේය.
මෙම නවතම වර්ධනය පිළිබඳව අදහස් දක්වමින් ශ්‍රී ලංකා පොදුජන පෙරමුණේ මහලේකම් පාර්ලිමේන්තු මන්ත්‍රී සාගර කාරියවසම් පවසා ඇත්තේ, මෑත කාලයේ ශ්‍රී ලංකා පොදුජන පෙරමුණේ මන්ත්‍රීවරුන් විශාල පිරිසක් පක්ෂයේ විනය කඩකර ඇති අතර, එවැනි මන්ත්‍රීවරුන් කිහිපදෙනෙකු විපක්ෂයට එක්ව ඇති බවයි.
“ශ්‍රේෂ්ඨාධිකරණ තීන්දුවෙන් පසුව ඔවුන්ට එරෙහිව ක්‍රියාමාර්ග ගැනීම ගැන අපි බැරෑරුම් ලෙස සලකා බලනවා. අපි කළින් ඔවුන්ගෙන් පැහැදිලි කිරීම් ඉල්ලා සිටියා. අපි මේ සතියේ රැස්වෙලා ඔවුන්ට එරෙහිව ඉදිරි ක්‍රියාමාර්ග ගැන සාකච්ඡා කරනවා,” ඔහු සඳහන් කර තිබේ.
කෙසේ වෙතත්, උදය ගම්මන්පිල, විමල් වීරවංශ සහ වාසුදේව නානායක්කාර වැනි මන්ත්‍රීවරුන් විවිධ පක්ෂවල සිට මැතිවරණ අරමුණු සඳහා ශ්‍රී ලංකා පොදුජන පෙරමුණ සමඟ එක්ව සිටින බැවින් ඔවුන්ට එරෙහිව විනය ක්‍රියාමාර්ග ගැනීමට ශ්‍රී ලංකා පොදුජන පෙරමුණට නොහැකි වනු ඇතැයි ඔහු පවසයි.
“ඩලස් අලහප්පෙරුම, ඩිලාන් පෙරේරා, අනුර යාපා වැනි ශ්‍රී ලංකා පොදුජන පෙරමුණේ ස්ථාවරයට පටහැනිව ක්‍රියා කළ ශ්‍රී ලංකා පොදුජන පෙරමුණේ මන්ත්‍රීවරු ඉන්නවා. අපි ඔවුන්ට එරෙහිව ගතයුතු ක්‍රියාමාර්ග ගැන සළකා බලනවා” යැයි සාගර කාරියවසම් වැඩිදුරටත් සඳහන් කර ඇත.
