මැලේසියාවේ සෙන්තුල් හි කුලී නිවසකදී ශ්‍රී ලාංකිකයන් තිදෙනකු ඝාතනය කිරීම පිටුපස මුදල් ප්‍රශ්නයක් ඇතැයි විශ්වාස කෙරෙන බව වාර්තා වේ.

මැලේසියානු ජනමාධ්‍යවලට අනුව, ද ස්ටාර්, සිටි පොලිස් ප්‍රධානී කොමම් ඩතුක් අලවුදීන් අබ්දුල් මජිඩ් සඳහන් කර ඇත්තේ, එයට අදාළ නඩුව විසඳා ඇති බවත්, සැකකරුවන් හතරදෙනකුට මිනීමැරුම් චෝදනා එල්ල කිරීමට පොලිසියට උපදෙස් දී ඇති බවත්ය.

“සැකකරුවන් හතරදෙනා අතර වින්දිත අයගෙන් එක් අයෙක්ගේ මාපියන් මෙන්ම මෙම නඩුවේ ප්‍රධාන සැකකරුවන් වන තවත් ශ්‍රී ලාංකිකයන් දෙදෙනෙකුද ඇතුළත්ය. අපි විශ්වාස කරන්නේ මුදල් ප්‍රශ්න සහ ණය මිනීමැරීමට හේතුව බවයි.” පොලිස් ප්‍රධානීවරයා සඳහන් කර ඇත.

පසුගිය සැප්තැම්බර් 22 වැනිදා රාත්‍රී 11ට පමණ සෙන්තුල් හි වෙළඳසැලක ගබඩා කාමරයක මියගිය පුද්ගලයන් තිදෙනකු පොලිසිය විසින් සොයාගෙන තිබිණි.

ඔවුන්ගේ අත් පා බැඳ තිබූ අතර හිස ප්ලාස්ටික් බෑග්වලින් ආවරණය කර පැවැතිණි.

පසුගියදා (සැප්තැම්බර් 25) අත්අඩංගුවට ගත් ශ්‍රී ලාංකික සැකකරුවන් දෙදෙනා සහ සිද්ධිය වූ දින (සැප්තැම්බර් 22) අත්අඩංගුවට ගත් ශ්‍රී ලාංකික යුවළද ඊට ඇතුළත් වේ.

ශ්‍රී ලාංකික යුවළගේ රිමාන්ඩ් කාලය සැප්තැම්බර් 29 වැනිදා අවසන් වූ නමුත්, එම කාලය නැවතත් ඔක්තෝබර් 5 වැනිදා දක්වා දීර්ඝ කර ඇත.

කෙසේ වෙතත්, පසුගිය සෙනසුරාදා (සැප්තැම්බර් 30) මෙම යුවල අතුරින් පිරිමි පුද්ගලයා අත්අඩංගුවේ සිටියදී මිය ගොස් ඇති අතර, විමර්ශනයට සහාය වීම සඳහා සැකකරුවන් හත්දෙනෙක් තවමත් රිමාන්ඩ් භාරයේ සිටිති.

ශ්‍රී ලාංකිකයන් තිදෙනාගෙන් සහ පාකිස්තානු ජාතිකයාගෙන් ප්‍රශ්න කිරීමෙන් පසු ප්‍රධාන සැකකරුවන් දෙදෙනා අත්අඩංගුවට ගෙන ඇත.