October 5, 2023
ශ්‍රී ලංකා ඩිජිටල් අලෙවිකරණ සංගමය (DMASL), ආණ්ඩුව විසින් මෑතකදී ගැසට් කරන ලද මාර්ගගත (ඔන්ලයින්) ආරක්ෂණ පනත් කෙටුම්පත සම්බන්ධයෙන් කනස්සල්ල පළකර ඇත.
නිවේදනයක් නිකුත් කරමින් එම සංගමය පවසන්නේ, නීති සම්පාදනය සඳහා සියලුම පාර්ශ්වකරුවන් ඇතුළුවන ආකාරයෙන් සවිස්තරාත්මක සංවාදයක් අත්‍යවශ්‍ය බවයි.
ශ්‍රී ලංකාවේ ඩිජිටල් අලෙවිකරුවන් නියෝජනය කරන වෘත්තීය සංගමය ලෙස, මෙම අවකාශය තුළ නීති සම්මත කිරීම අවශ්‍ය බව තමන් විශ්වාස කරන බවද එම සංගමය පෙන්වාදෙයි.
“කෙසේ වෙතත්, නීති සම්පාදනය පුළුල් බව, අයහපත් බලපෑම් වළක්වාගැනීම සහ දිගු කාලීනව තිරසාර බව සහතික කිරීම සඳහා සියලුම පාර්ශවකරුවන් ඇතුළු සවිස්තරාත්මක සංවාදයක් අත්‍යවශ්‍ය වේ” යැයි සංගමය වැඩිදුරටත් අවධාරණය කරයි.
මාර්ගගත (ඔන්ලයින්) ආරක්ෂණ පනත් කෙටුම්පත 2023 සැප්තැම්බර් මාසයේදී ශ්‍රී ලංකා රජයේ ගැසට් පත්‍රයේ ප්‍රකාශයට පත් කරන ලදී.
පනත් කෙටුම්පතේ ප්‍රධාන අරමුණු අතරට ඔන්ලයින් ආරක්‍ෂක කොමිෂන් සභාව පිහිටුවීම, ශ්‍රී ලංකාවේ ඇතැම් සත්‍ය ප්‍රකාශ මාර්ගගත සන්නිවේදනය තහනම් කිරීමට විධිවිධාන සැලැස්වීම, තහනම් අරමුණු සඳහා මාර්ගගත ගිණුම් සහ අසත්‍ය අන්තර්ජාල ගිණුම් භාවිතය වැළැක්වීම, භාවිත කරන මාර්ගගත ස්ථාන හඳුනාගෙන ප්‍රකාශ කිරීමට විධිවිධාන සැලැස්වීම ඇතුළත් වේ.
