උතුර සහ නැගෙනහිර පළාත්වල පුරාවිද්‍යාත්මක ස්ථාන ආරක්ෂා කර ගැනීමේ ප්‍රයත්නයේදී ජාතීන් අතර අනවශ්‍ය ආරවුලක් ඇති නොවන අයුරින් තීන්දු තීරණ ගැනීම රජයේ වගකීමක් බව සියම් නිකායේ අස්ගිරි පාර්ශවය ඊයේ (28) ප්‍රකාශ කර ඇත.

බෞද්ධ විහාරස්ථානයක් සහ හින්දු කෝවිලක් ඉදිකිරීම සඳහා කුරුන්දි පුරාවිද්‍යා භූමියෙන් පිටත අක්කර තුනක් වෙන් කර එය මහජන පරිහරණය සඳහා ලබාදීමට බුද්ධශාසන, ආගමික හා සංස්කෘතික කටයුතු අමාත්‍යාංශයෙන් යෝජනාවක් ඉදිරිපත් වී ඇතැයි වාර්තා වේ.

පසුගියදා පැවැති ආගමික කටයුතු සහ සහජීවනය පිළිබඳ පාර්ලිමේන්තු ආංශික අධීක්ෂණ කාරක සභාවේදී අමාත්‍යාංශ ලේකම්වරයා විසින් මෙම යෝජනාව ඉදිරිපත් කර ඇත.

ඉතා මෑතක දී එම යෝජනාව ඉදිරිපත් කර මේ දක්වා තීරණයක් ගෙන නොමැති බවත්, වාර්ගික කණ්ඩායම් අතර ආතතියට තුඩුනොදිය යුතු, අවසානයේ වඩාත්ම සුදුසු තීරණය ගැනීම රජයේ වගකීමක් බවත්, අස්ගිරි මහා විහාරයේ මහලේකම් ආචාර්ය මැදගම ධම්මානන්ද හිමියෝ පවසති.

කුරුන්දි විහාරය දැනටමත් පුරාවිද්‍යා දෙපාර්තමේන්තුව මගින් පවා බෞද්ධ පුරාවිද්‍යා ස්ථානයක් ලෙස හඳුනාගෙන ඇති බැවින්, මේ සම්බන්ධයෙන් තීන්දු තීරණ ගැනීමේදී රජය එම කරුණ කෙරෙහි විශේෂ අවධානයක් යොමු කළ යුතු බවද උන්වහන්සේ පෙන්වාදෙති.

අත්‍යවශ්‍යම කරුණ වන්නේ, විවිධ ආගමික සහ ජනවර්ග අතර සහජීවනය පවත්වාගෙන යෑම බවත්, එමනිසා දෙපාර්තමේන්තුව මෙම ගැටලුව පිළිබඳව ඉතා කල්පනාකාරීව සහ සංවේදීව සොයාබැලිය යුතු බවත්, උන්වහන්සේ පවසති.

එම නිකායේ අස්ගිරි පාර්ශවය සහ මල්වතු පාර්ශවය යන පාර්ශව දෙකම මේ සම්බන්ධයෙන් ජනාධිපතිවරයාට සහ රජයට අවස්ථා කිහිපයකදීම කරුණු ඉදිරිපත් කර ඇති බවද මැදගම ධම්මානන්ද හිමියෝ වැඩිදුරටත් සඳහන් කරති.