ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලක ඕස්ට්‍රේලියාවේදී කාන්තාවකට ලිංගික අතවර කළ බවට එල්ල වී ඇති චෝදනා සම්බන්ධයෙන් සිඩ්නි අධිකරණයේදී ලබන සතියේ නඩු විභාගයට පෙනීසිටීමට නියමිතය.

32 හැවිරිදි ඔහු වෙනුවෙන් පෙනී සිටි නීතිඥවරු අද ඩව්නිං සෙන්ටර් දිස්ත්‍රික් උසාවියේ පෙනී සිටියේ ගුණතිලක ලබන සඳුදා සිට විනිසුරුවරයකුගෙන් පමණක්(ජූරියක් නොමැතිව) සමන්විත නඩු විභාගයකට මුහුණදීමට සූදානම් වන බැවිනි.

ධනුශ්ක සහ අදාළ කාන්තාව පසුගිය වසරේ නොවැම්බර් 2 වැනි දින එකිනෙකා හමුවීමට පෙර කිහිප වතාවක්ම කතාබහ කළ බව පොලිසිය ප්‍රකාශ කරයි.

පොලිසිය පවසන පරිදි ලිංගික අතවරය සිදු වූ බව කියන විට රාත්‍රී 11 ට පමණ නැගෙනහිර ප්‍රදේශයේ පිහිටි කාන්තාවගේ නිවසට ආපසු යාමට පෙර මෙම යුවළ නගරයේ මත්පැන් පානය කර ඇත.

ඒ වන විට ධනුශ්ක ඔස්ට්‍රේලියාවට ගොස් සිටියේ T20 ලෝක කුසලානයට ක්‍රීඩා කිරීමටය.

මෙම වසර මුලදී ඔහු කැමැත්තෙන් තොරව ලිංගික සංසර්ගයේ යෙදුණු බවට එල්ල කෙරුණු එක් චෝදනාවකට වරද පිළිගත්තේ නැත.

නඩු විභාගය දින තුන හතරක් පවතිනු ඇතැයි අපේක්ෂා කරන අතර ඔහුට සිංහල භාෂා පරිවර්තකයකුගේ සහාය ලැබෙන බව ප්‍රකාශ වී තිබේ.