September 6, 2023
රාජ්‍ය ඇමැති ශිවනේෂතුරෙයි චන්ද්‍රකාන්තන් හෙවත් පිල්ලෙයාන් ඔහුගේ හිටපු මාධ්‍ය ප්‍රකාශක අසාද් මවුලානාට දැඩි ලෙස බැන වදිමින් විදේශ සරණාගතභාවය සඳහා වන ඔහුගේ ඉල්ලීම ශක්තිමත් කරගැනීම සඳහා බොරු ප්‍රකාශ කරන බවට චෝදනා කර ඇත.
පාස්කු ඉරිදා ප්‍රහාරයට හෝ බෝම්බකරුවන්ට කිසිදු සම්බන්ධයක් නොමැති බව පිල්ලෙයාන් ප්‍රකාශ කර ඇත්තේ එවැනි චෝදනා පදනම් විරහිත බව පවසමිනි.
නිවේදනයක් නිකුත් කරමින් පිල්ලෙයාන් කියා පවසන්නේ, තම පක්ෂය වන තමිල් මක්කල් විදුතලෙයි පුල්ලිකල් (TMVP)හි නාමය බොහෝ විට ජනතාව නොමග යැවීමට යොදාගන්නා බවයි.
තමිල් මක්කල් විදුතලෙයි පුල්ලිකල් (TMVP) හි ප්‍රධාන ප්‍රකාශක අසාද් මවුලානා ‘චැනල් 4’ නාලිකාව වෙත සම්මුඛ සාකච්ඡාවක් ලබාදෙමින්, 2019 පාස්කු ප්‍රහාරයට පෙර ශ්‍රී ලංකා හමුදා බුද්ධි අංශ නායකයන් පාස්කු ඉරිදා බෝම්බකරුවන් හමුවූ බව චෝදනා කළේය.
ඊයේ (අඟහරුවාදා) බ්‍රිතාන්‍ය රූපවාහිනී නාලිකාවේ විකාශය ප්‍රචාරය කළ චැනල් ෆෝ ඩිස්පැචස් වාර්තා චිත්‍රපටියේ පූර්ව ප්‍රචාරක පටයේදී මවුලානා චෝදනා කළේ මෙම හමුව නැගෙනහිර ප්‍රදේශයේ සිදුවූ බවත් තමන්ද එහි සිටි බවත්ය.
දැන් විදේශගත සරණාගතභාවය අපේක්ෂාවෙන් සිටින හිටපු TMVP මාධ්‍ය ප්‍රකාශකයා, එක්සත් ජාතීන්ගේ සහ යුරෝපා සංගමය මෙන්ම අනෙකුත් රාජ්‍ය තාන්ත්‍රික දූත මණ්ඩල සමඟ මෙම තොරතුරු බෙදාගෙන ඇත.
