දේශීය ආදායම් දෙපාර්තමේන්තුව විසින් කොළඹ නගරයේ සුඛෝපභෝගී මහල් නිවාසවල පදිංචිකරුවන්ගේ තොරතුරු රැස්කිරීමට පටන්ගෙන ඇත.

අදාළ නිවාස හිමියන් නියමිත පරිදි රජයට බදු ගෙවන්නේද යන්න හඳුනාගැනීම සඳහා දෙපාර්තමේන්තුව මෙලෙස තොරතුරු රැස්කරමින් සිටින බව වාර්තාවේ.

ඒ අනුව මහල් නිවාසවල පදිංචිකරුවන්ගේ තොරතුරු සිය දෙපාර්තමේන්තුව වෙත ලබාදෙන ලෙස මහල් නිවාස කළමනාකරණ සමාගම් වෙත ලිඛිතව දැනුම්දී තිබේ.

කෙසේවෙතත් කොළඹ නගරයේ සහාධිපත්‍ය දේපල හිමියන් සහ පදිංචිකරුවන් පිළිබඳව මහල් නිවාස කළමනාකරණ සමාගම්වලින් මෙලෙස තොරතුරු ඉල්ලීමට ගත් පියවර මතභේදයට තුඩු දී ඇති අතර, එය සදාචාරාත්මක ගැටළු මතු කර ඇත.

මෙම පියවර, එය ‘ආචාරධර්ම විරෝධී’ ලෙස සලකන කණ්ඩායම්වල විවේචනයට ලක්ව තිබේ.

තනි පුද්ගල තොරතුරු ඉල්ලීම පුරවැසියන්ගේ අයිතිවාසිකම් උල්ලංඝනය කළ හැකි බවට ඇතැමුන් කනස්සල්ල පළ කර ඇත.

එහෙත්, 2007 අංක 24 දරන දේශීය ආදායම් පනතේ 123(1) වගන්තියේ දක්වා ඇති පරිපාලන ප්‍රතිපාදන සමඟ තොරතුරු ඉල්ලීම සමපාත වන බව ප්‍රකාශ කරමින් දේශීය ආදායම් දෙපාර්තමේන්තුව සිය ක්‍රියාමාර්ග සාධාරණීකරණය කර තිබේ.