August 20, 2023
දිගු කලක් තිස්සේ නොසලකා හරින ලද රටේ ඛනිජ සම්පත් ක්ෂේත්‍රයට අදාල දේශීය හා විදේශීය ආයෝජන ප්‍රවර්ධනය කිරීමේ අරමුණින් ජනාධිපති රනිල් වික්‍රමසිංහ විසින් ඉදිරිපත් කරන ලද යෝජනා කිහිපයකට කැබිනට් මණ්ඩලය අනුමැතිය ලබා දී ඇති බව වාර්තා වේ.
එසේම ආයෝජන යෝජනා භාර ගැනීමේ සහ තක්සේරු කිරීමේ බලය භූ විද්‍යා සමීක්ෂණ හා පතල් කාර්යාංශයෙන් (GSMB) ආයෝජන මණ්ඩලය (BOI) වෙත මාරු කිරීමටත් කැබිනට් මණ්ඩලය තීරණය කර ඇත.
පතල් සහ ඛනිජ (සංශෝධන) පනත යටතේ ප්‍රකාශයට පත් කිරීමට නියමිත රෙගුලාසියක් හරහා, ලැබෙන ආදායම භූ විද්‍යා සමීක්ෂණ හා පතල් කාර්යාංශය සහ ඒකාබද්ධ අරමුදල සමඟ බෙදා ගැනීමට නියමිතව තිබේ.
ජාතික සංවර්ධනය සඳහා ශ්‍රී ලංකාවේ ඛනිජ සම්පත් ඵලදායි ක්‍රම පිළිබඳ ප්‍රතිපත්තියක් සම්පාදනය කිරීමේ ප්‍රධාන මෙහෙයුමේ කොටසක් ලෙස ආයෝජන ප්‍රවර්ධන ඇමැතිවරයා ලෙස ජනාධිපතිවරයා විසින් අදාළ සංදේශය ඉදිරිපත් කර ඇත.
ආයෝජකයන්ට සියයට 10ක් අභ්‍යන්තර ආයෝජන ගිණුමක් හෝ දේශීය බැංකු ගිණුමක් හරහා ප්‍රේෂණය කරන ලෙසත්, පතල් ව්‍යාපෘති සඳහා අනුමැතිය ලබා දීමට පෙර සහ පතල් බලපත්‍රයක් නිකුත් කිරීමට පෙර ආයෝජන මණ්ඩලයට ලේඛනගත සාක්ෂි ඉදිරිපත් කරන ලෙසත් දැනුම් දී තිබේ.
ගිවිසුම අත්සන් කර වසර දෙකක් ඇතුළත මුළු ආයෝජනය ලබා ගැනීමට අදාලව ආයෝජන මණ්ඩල විසින් කොන්දේසි පැනවේ.
බර ඛනිජ වැලි සහ ඛනිජ අමුද්‍රව්‍ය ලෙස අපනයනය කරන පතල් ව්‍යාපෘතියක් ආරම්භ කිරීම සඳහා අවම ආයෝජන සීමාව ඇමෙරිකානු ඩොලර් මිලියන 50 කි.
එසේ වුවද, ව්‍යාපෘතියේ ඛනිජ වර්ගය සහ සැකසුම් මත පදනම්ව, සීමාවන් තීරණය කිරීමට ආයෝජන මණ්ඩලයට අවසර දීමට කැබිනට් මණ්ඩලය එකඟ වී ඇත.
ඇමැති මණ්ඩලය විසින් තීරණය කරන ලද පරිදි, ගවේෂණ, පතල් කැණීම, සැකසීම, ප්‍රවාහනය, ගබඩා කිරීම, වෙළඳාම සහ අපනයනය සඳහා බලපත්‍ර නිකුත් කිරීමේ බලය රඳවා ගනිමින් පතල් හා ඛනිජ පනතේ විධිවිධාන යටතේ නියාමන ආයතනයක් ලෙස භූ විද්‍යා සමීක්ෂණ හා පතල් කාර්යාංශය ක්‍රියා කරනු ඇත.
එසේම ඛනිජ සම්පත් නියාමන කොමිෂන් සභාවක් පිහිටුවීම සඳහා නීති සම්පාදනය කිරීමට නීති කෙටුම්පත් සම්පාදකට උපදෙස් දීමට ඇමැති මණ්ඩලය විසින් වෙන වෙනම අනුමැතිය ලබා දී තිබේ.
