ඉන්දියාව සහ ශ්‍රී ලංකාව අතර යෝජිත ද්විත්ව පෙට්‍රෝලියම් නළ මාර්ගය අදාළ අනුමැතිය ලැබීමෙන් පසු වසර 2-3ක් ඇතුළත එය ඉදිකළ හැකි බව වාර්තා සඳහන් කරයි.

ව්‍යාපෘතියේ මූලික අධ්‍යයනය මේ වන විට අවසන් කර ඇති බව දැනගන්නට ඇත.

කෙසේ වෙතත්, ව්‍යාපෘතිය අනුමත කිරීමට පෙර සවිස්තරාත්මක ශක්‍යතා වාර්තාවක් අවශ්‍ය වේ.

“ශ්‍රී ලංකා ජනාධිපතිවරයාගේ ඉන්දීය සංචාරය අවසානයේ නිකුත් කරන ලද ඒකාබද්ධ ප්‍රකාශයේ සඳහන් ආකාරයට මෙම ව්‍යාපෘතිය සඳහා සවිස්තරාත්මක ශක්‍යතා වාර්තාවක් පැවැතීමම අපේක්ෂා කරයි. මේ සඳහා සූදානම් කිරීමේ කටයුතු ආරම්භ කර ඇත. නිශ්චිත කාලසීමාවන් මෙම අභ්‍යාසයේ ප්‍රතිඵල මත රඳා පවතින අතර, පෙර අත්දැකීම් අනුව ඉදිකිරීම් සඳහා වසර දෙකේ සිට තුන දක්වා කාලයක් ගතවනු ඇතැයි අපේක්ෂා කෙරේ.” යැයි කොළඹ ඉන්දීය මහ කොමසාරිස් කාර්යාලයේ ප්‍රකාශකයෙක් සඳහන් කරයි.

මෙම නළ මාර්ගය ඉන්දීය සාගරයේ අසල්වැසි රටවල් අතර සම්බන්ධතාව වැඩිදියුණු කිරීමේ ප්‍රයත්නයේ වැදගත් අංගයක් ලෙස සළකනු ලබන අතර, ද්විපාර්ශ්වික ආර්ථික හවුල්කාරිත්වය ඉහළ නැංවීමට දෙරටේ කැමැත්ත ප්‍රකාශ කළ ජනාධිපති රනිල් වික්‍රමසිංහගේ සංචාරයේදී ඒ පිළිබඳව පසුගියදා සාකච්ඡා කෙරිණි.

ඉන්දියාවේ නාගපට්ටිනම් සිට ශ්‍රී ලංකාව දක්වා කිලෝමීටර් 600ක නළ මාර්ගයේ ඉදිකිරීම් සඳහා යෝජනා ඉදිරිපත්වී ඇත.

විදුලිබල හා බලශක්ති අමාත්‍යාංශයට අනුව ව්‍යාපෘතිය ඇගයීම සඳහා විශේෂඥ කමිටුවක් තෝරා ගැනීමට ශ්‍රී ලංකාව කඩිනමින් කටයුතු කරමින් සිටී.

යෝජිත කිලෝමීටර් 600ක් දිග (පෝක් සමුද්‍ර සන්ධිය හරහා කිලෝමීටර් 70ක උපමුහුදු කොටසක් සහිත) ද්වි-දිශා බහු නිෂ්පාදන පෙට්‍රෝලියම් නළ මාර්ගයෙන් ශ්‍රී ලංකාවට අවශ්‍ය පෙට්‍රල්, ඩීසල් සහ භූමිතෙල් අවශ්‍යතා ඉන්දීය තෙල් සංස්ථාවට අයත් තමිල්නාඩුවේ කාවේරි ද්‍රෝණිය, නාගපට්ටිනම්හි නව පිරිපහදුවෙන් සැපයීමට අපේක්ෂා කෙරේ.