ශ්‍රී ලංකාවේ හිටපු ජනාධිපතිවරුන්ට ලබාදී තිබූ නිල නිවාසවල විදුලිය හා ජල ගාස්තු, ජංගම දුරකථන බිල්පත් සඳහා මුදල් වෙන් කිරීම වැනි ඇතැම් වරප්‍රසාද අත්හිටුවීමට ජනාධිපති කාර්යාලය තීරණය කර තිබේ.

ලංකාදීපයට අනුව, හිටපු ජනාධිපතිවරයකුගේ ලේකම්වරයකු පසුගිය මාසයේ බිල්පත් ඊයේ (ජූලි 24) පෙරවරුවේ ජනාධිපති කාර්යාලයට ඉදිරිපත් කිරීමෙන් පසු මෙම තීරණය දැනුම් දී ඇත.

නීතිපතිවරයාගේ උපදෙස් පරිදි හිටපු ජනාධිපතිවරුන්ගේ කිසිදු බිල්පතක් ජනාධිපති කාර්යාලයෙන් පියවීමට පියවර නොගන්නා බව එහිදී ලේකම්වරයාට දන්වා තිබේ.

මහින්ද රාජපක්ෂ ජනාධිපති ධුරය දැරූ සමයේ හිටපු ජනාධිපතිනි චන්ද්‍රිකා බණ්ඩාරනායක කුමාරතුංගට පිරිනැමීමට නියමිත වරප්‍රසාද සම්බන්ධයෙන්, හිටපු අගවිනිසුරු සරත් එන්. සිල්වා ලබාදුන් තීන්දුවකට අනුව නීතිපති කාර්යාලය මෙම දැනුම්දීම සිදුකර තිබේ.

එම තීරණයට අනුව හිටපු ජනාධිපතිවරුන්ට හිමිවන්නේ නිල නිවසක් සහ වාහන නඩත්තුව හා ඉන්ධන සඳහා මුදල් පමණි.