අධිවේගී මාර්ග ඉදිකිරීම, මාර්ග සංවර්ධන අධිකාරිය (RDA) විසින් 2020 ඔක්තෝම්බර් මාසයේදී පිහිටුවන ලද ‘සහස්යා’ (Sahasya Investments Ltd (SIL)) නම් රජය සතු සමාගමක් වෙත මාරු කිරීමට ඇමැති මණ්ඩල අනුමැතිය ලබා දී ඇත.

අධිවේගී මාර්ග කළමනාකරණය කිරීමේදී, සහස්යා හරහා රාජ්‍ය-පෞද්ගලික හවුල්කාරිත්වයන් (PPP) ක්‍රියාත්මක කිරීමේ හැකියාව පිළිබඳව රජය සළකා බලමින් පවතින බව වාර්තා වේ.

පසුගිය වසර පහ තුළ RDA වෙත “වාණිජ්‍ය නොවන” රාජ්‍ය ව්‍යවසායයක් (SOE) මඟින් ලබා දී ඇති සාමාන්‍ය වාර්ෂික ප්‍රාග්ධනය සහ පුනරාවර්තන ප්‍රදානය රුපියල් බිලියන 106ක මුදලක් බව මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය ඉදිරිපත් කළ ඇමැති මණ්ඩල සංදේශයකින් හෙළි වී තිබේ.

එමෙන්ම අධිවේගී මාර්ග ජාලයෙන් වාර්ෂික අභ්‍යන්තර අරමුදල් උත්පාදනය රුපියල් බිලියන 07ක් පමණ වන අතර, මාර්ගවලින් ලැබෙන මෙම ආදායම හැර, මාර්ග සංවර්ධන අධිකාරිය සම්පූර්ණයෙන්ම පාහේ රජයේ අයවැය මත රඳා පවතී.

මහා භාණ්ඩාගාරය විසින් සහතික කරන ලද එහි ණය සංරචකය රුපියල් බිලියන 352ක් පමණ වන අතර, RDA හි වර්තමාන නොවන වත්කම් තක්සේරුව (ණය හෝ කෙටි කාලීන වගකීම් සඳහා ඉක්මනින් මුදල් හෝ මුදල් බවට පරිවර්තනය කළ නොහැකි වත්කම්) පසුගිය වසර අවසානයේ රුපියල් බිලියන 932ක් පමණ වී ඇත.

RDA විසින් අයවැය අනුග්‍රහය ඇතිව අනෙකුත් මාර්ග ජාලයන් නඩත්තු කර පුළුල් කළ යුතු බවත්, ලැබෙන අරමුදල්වලට සරිලන සේ එහි සේවා මට්ටම වැඩිදියුණු කළ යුතු බවත්, කැබිනට් මණ්ඩලය යෝජනා කර ඇත.

RDA හි මූල්‍ය තත්ත්වය වැඩිදියුණු කිරීමට ඇමැති මණ්ඩලය උපදෙස් දී ඇති අතර, එහි අයවැය සහ මානව සම්පත් භාවිතයේ කාර්යක්ෂමතාව ඉහළ නැංවීම සඳහාවන සැලැස්මක් මාස තුනක් ඇතුළත ඉදිරිපත් කරන ලෙස ප්‍රවාහන හා මහාමාර්ග අමාත්‍යාංශයේ ලේකම්වරයාට උපදෙස් දී ඇති බව ලේඛන මඟින් වාර්තා වේ.

විධිමත් මූල්‍ය ප්‍රකාශන සමඟින් තම ව්‍යාපාරික මෙහෙයුම් මෙන්ම මූල්‍ය හා මූල්‍ය නොවන ප්‍රගතිය විනිවිදභාවයෙන් යුතුව සිදු කරන අතරම RDA සිය මාර්ග ජාලය යළි තක්සේරු කිරීමට ද අපේක්ෂා කෙරේ.