95 හැවිරිදි පෙම්වතකු සිය 90 හැවිරිදි දිගුකාලීන පෙම්වතිය සමඟ විවාහ වූ පුවතක් පසුගිය සති අන්තයේදී කෙන්යාවෙන් වාර්තා විය.

ඔවුන් එලෙස විවාහ වී ඇත්තේ ඔවුන් දෙපළගේ පළමු හමුවීමෙන් දශක හයකට පසුව බව එරට ජනමාධ්‍ය වාර්තා කර තිබේ.

ඉබ්‍රාහිම් එම්බෝගෝ නමැති එම 95 හැවිරිදි පෙම්වතා ඉකුත් ඉරිදා කෙන්යාවේ පල්ලියකදී සිය 90 හැවිරිදි පෙම්වතිය වන තබිතා වැන්ගුයි සමඟ විවාහ වී ඇති අතර ඔවුන්ගේ විවාහය පිළිබඳ පුවත අන්තර්ජාලය හරහා වේගයෙන් සංසරණය වූ බව ජනමාධ්‍ය ආයතනයක් සිටිසන් ඩිජිටල් වාර්තා කළේය.

“අපි 1960 දී මුණගැසී ආදරයෙන් බැඳුණෙමු, ඔබට ඇසෙනවාද?” කෙන්යාවේ නයිරෝබි අගනුවරට ඊසාන දෙසින් පැය තුනක ගමනක් යා හැකි නගරයක් වන මුකුර්වේනි හි පල්ලියෙන් පිටතදී එම්බෝගෝ, තබිතා වැන්ගුයි හට පැවසූ බව කෙන්යාවේ ජනමාධ්‍ය වාර්තා කර තිබේ.

“අපි එකට සාකච්ඡා කරලා තීරණය කළා අපි විවාහයක් කරනවා නම් හොඳයි කියලා, අපි අපේ කිකුයු චාරිත්‍රානුකූලව දන්නවා අපි නීත්‍යානුකූලව විවාහකයි කියලා, නමුත් අපිත් ක්‍රිස්තියානීන් නිසා, අපි පල්ලියේ විවාහයක් කරන්න තීරණය කළා.” ඔහු ජනමාධ්‍ය වෙත පැවසීය.

මනාලයා ඔවුන්ගේ විශේෂ දිනය සඳහා අළු පැහැති දැකුම්කළු ඇඳුමකින් සැරසී රිදී පැහැ ටයි පටියක් පැළඳ සිටි අතර, ඔහුගේ මනාලිය සුදු පැහැති තොප්පියකින් සැරසී සිටි අතර සුදු ඇඳුමකට ක්‍රීම් බ්‍රෝකේඩ් ජැකට් එකකින් සැරසී සිටියාය.

ඔවුන්ගේ දිගුකාලීන පෙම් සබඳතාව ගැන විමසූ විට වැන්ගුයි ජනමාධ්‍ය වෙත මෙසේ පැවසීය: “කාන්තාවනි, ඔබ ඔබේ ස්වාමිපුරුෂයන්ට ගරු කළ යුතුය, ඔබ එය කරන්නේ නම්, ඔබ අප මෙන් ජීවත් වනු ඇත.

කිසිදු වරදක් නොකරන්න, වරදක් කළ විට සමාව ඉල්ලන්න.”