දිවයින පුරා රෝහල්වල මික්ස්ටාර්ඩ් ඉන්සියුලින් හිඟයක් වාර්තා වීමත් සමඟ ක්ෂණික ඉල්ලුම සපුරාලීම සඳහා මෙම සතිය තුළ මික්ස්ටාර්ඩ් ඉන්සියුලින් ඒකක 85,000ක් පමණ මිලදී ගන්නා බව සෞඛ්‍ය අමාත්‍යාංශයේ වෛද්‍ය සැපයුම් අංශය පවසයි.

වෛද්‍ය සැපයුම් සම්බන්ධ නියෝජ්‍ය අධ්‍යක්ෂ ජනරාල් වෛද්‍ය ජී විජේසූරිය පවසන්නේ තත්ත්වය දැනටමත් පාලනය කර ඇති බවයි.

“අපි දැනටමත් මෙම ගැටලුව විසඳීමට පියවර ගෙන තිබෙනවා. වෙළඳපොළේ අනෙකුත් සැපයුම්කරුවන්ගෙන් අපට ගන්න පුළුවන් වුණා. 1 වැනිදා අපි මික්ස්ටාර්ඩ් ඉන්සියුලින් ඒකක 7,500ක් මිලදී ගත්තා. තවත් ඒකක 5000ක් ඉතා ඉක්මනින් අපට ලැබීමට නියමිතයි. මේ සතිය ඇතුළත අපි මික්ස්ටාර්ඩ් ඉන්සියුලින් ඒකක 85,000ක් මිලදී ගැනීමට කටයුතු කර තිබෙනවා. එය මෙම තාවකාලික හිඟයට පිළියම් යෙදීමට ප්‍රමාණවත්.” යනුවෙන් ඔහු ප්‍රකාශ කර තිබේ.

සති තුනක් ඇතුළත සැපයුම සාමාන්‍ය තත්ත්වයට පත් වන බව ඔහු වැඩිදුරටත් සඳහන් කරයි.

සෞඛ්‍ය ඇමැති වෛද්‍ය නලින්ද ජයතිස්ස පවසන්නේ ප්‍රසම්පාදන ක්‍රියාවලිය ප්‍රමාදවීම හේතුවෙන් මෙම හිඟය ඇති වූ බවයි.

කෙසේවෙතත් එම තත්ත්වය නිවැරදි කිරීමට පියවර ගෙන තිබේ.

“අපි සති තුනකට පමණක් ඉන්සියුලින් ඒකක සොයාගත යුතුයි. ඉන්පසුව, සැපයුම සාමාන්‍ය තත්ත්වයට පත් වෙයි. ගැටලුව වූයේ ප්‍රසම්පාදන ක්‍රියාවලියේයි. අඩුපාඩු සහ ප්‍රමාදය සඳහා අපි පියවර අරන් තියෙන්නේ,” යනුවෙන් ඔහු පවසා තිබේ.

මේ අතර, රජයේ වෛද්‍ය නිලධාරීන්ගේ සංගමයේ (GMOA) ප්‍රකාශක වෛද්‍ය චමිල් විජේසිංහ පවසන්නේ ද ප්‍රසම්පාදනය ආශ්‍රිත ප්‍රමාදයන් නිසා දියවැඩියාවට ප්‍රතිකාර කිරීමට අත්‍යවශ්‍ය ඉන්සියුලින් හිඟයකට මුහුණ දී සිටින බවයි.

දියවැඩියාවට ප්‍රතිකාර කිරීම සඳහා භාවිත කළ හැකි මුඛ ඖෂධ කිහිපයක් තිබුණ ද ඒවා බොහෝදුරට පෞද්ගලික රෝහල්වල ඇති බැවින් සාමාන්‍ය රෝගීන්ට දැරිය නොහැකි බව ඔහු පෙන්වා දෙයි.

කෙසේවෙතත් වසරක කාලයක් සඳහා හඳුනාගත් දේශීය නිෂ්පාදකයන්ගෙන් ඖෂධ සහ වෛද්‍ය සැපයුම් ලැයිස්තුවක් සඳහා ඇමැති මණ්ඩලය අනුමැතිය ලබා දී ඇත.

ඊයේ පැවති කැබිනට් මාධ්‍ය හමුවට එක්වෙමින් ඇමැති වෛද්‍ය ජයතිස්ස ප්‍රකාශ කළේ වසරක කාලයක් සඳහා හඳුනාගෙන ඇති දේශීය නිෂ්පාදකයන්ගෙන් දේශීයව නිෂ්පාදනය කරන ඖෂධ සහ වෛද්‍ය සැපයුම් මිලදී ගැනීමට ඔක්තෝබර් 14 වැනිදා පැවති ඇමැති මණ්ඩල රැස්වීමේදී අනුමැතිය හිමිව ඇති බවයි.

ඒ අනුව, සෞඛ්‍ය අමාත්‍යාංශය විසින් රාජ්‍ය ඖෂධ නිෂ්පාදන සංස්ථාව, එම සංස්ථාව සමඟ හවුල් ව්‍යාපාර ගිවිසුම් අත්සන් කර ඇති දේශීය නිෂ්පාදකයන්, අමාත්‍යාංශය සමඟ මිලදී ගැනීමේ ගිවිසුම් අත්සන් කර ඇති දේශීය නිෂ්පාදකයන් සහ දැනට ගිවිසුම්ගත වී නොමැති දේශීය නිෂ්පාදකයන් විසින් සැපයිය හැකි ඖෂධ ලැයිස්තු හතරක් සකස් කර ඇත.

එම ලැයිස්තු හතර පරීක්ෂා කර ඇමැති මණ්ඩලය විසින් පත් කරන ලද ස්ථාවර ප්‍රසම්පාදන කමිටුව විසින් ඉදිරිපත් කරන ලද නිර්දේශ මත පදනම්ව, පහත සඳහන් ප්‍රසම්පාදන ප්‍රදානය කිරීම සඳහා ඇමැති ජයතිස්ස විසින් ඉදිරිපත් කරන ලද යෝජනාව ඇමැති මණ්ඩලය විසින් අනුමත කර ඇත.

ඖෂධ වර්ග 42ක් රාජ්‍ය ඖෂධ නිෂ්පාදන සංස්ථාවෙන් සැපයීමට රුපියල් මිලියන 5,398.83ක මුදලක්, රාජ්‍ය ඖෂධ නිෂ්පාදන සංස්ථාව සමඟ හවුල් ව්‍යාපාර ගිවිසුම් අත්සන් කර ඇති දේශීය නිෂ්පාදකයන්ගෙන් ඖෂධ වර්ග 131ක් ගැනීමට රුපියල් මිලියන 16,611.42ක්, අමාත්‍යාංශය සමඟ ගිවිසුම් අත්සන් කර ඇති දේශීය නිෂ්පාදකයන්ගෙන් ඖෂධ වර්ග 36ක් ගැනීමට රුපියල් මිලියන 9,022.10ක් සහ අලුතින් තෝරාගත් දේශීය නිෂ්පාදකයන් 24 දෙනෙකුගෙන් ඖෂධ වර්ග 130ක් ගැනීමට රුපියල් මිලියන 13,374.65ක මුදලක් ප්‍රසම්පාදන කටයුතු වෙන්කිරීමට ඇමැති මණ්ඩල අවසරය ලැබිණි.