November 16, 2023
ගෙවී ගිය මාස තුනක කාලය තුළ නීති විරෝධී මත්ද්‍රව්‍ය කිලෝ ග්‍රෑම් 50ක් රේගු භාරයට ගෙන ඇතැයි මුදල් රාජ්‍ය ඇමැති රංජිත් සියඹලාපිටිය පවසයි.
ඒ අතර කුෂ් සහ හෂිස් යන මත්ද්‍රව්‍ය වන බව ඇමැතිවරයා සඳහන් කරයි.
කැනඩාවේ සිට මෙරටට ආනයනය කළ බහාලුමක තිබී පසුගිය දා සොයාගත් කුෂ් මත්ද්‍රව්‍ය තොගයක් නිරීක්ෂණය කිරීම සඳහා අද (16) ඔරුගොඩවත්ත රේගු අංගනය වෙත ගියා අවස්ථාවේ ඇමැතිවරයා මේ බව කියාසිටියේ ය.
පසුගිය මස 25 වැනිදා ශ්‍රී ලංකාවට ආනයනය කරන ලද මෙම බහාලුම පිළිබඳ ඇති වූ සැකය මත රේගුවේ ආදායම් අධීක්ෂණ බලකාය විසින් අත්අඩංගුවට ගන්නා ලදී.
පොලිස් මත්ද්‍රව්‍ය නිවාරණ කාර්යාංශය සමග සිදුකළ පරීක්ෂාවේ දී එහි තිබී කුෂ් මත්ද්‍රව්‍ය කිලෝ ග්‍රෑම් 06ක් සොයාගැනිණි.
එම තොගයේ වටිනාකම රුපියල් මිලියන 60ක් පමණ වන බව ඇමැතිවරයා සඳහන් කරයි.
ඉතාලියේ සිට ගෙන් වූ බහාලුමක තිබී හෂීස් මත්ද්‍රව්‍ය කිලෝ ග්‍රෑම් 35ක් සහ අමෙරිකාවේ සිට ආනයනය කරන ලද බහාලුමක තිබී කුෂ් මත්ද්‍රව්‍ය කිලෝ ග්‍රෑම් 10.5ක් මීට පෙර සොයාගෙන තිබිණි.
