ශ්‍රේෂ්ඨාධිකරණයේ පුරප්පාඩු හතරක් සහ අභියාචනාධිකරණයේ පුරප්පාඩු දෙකක් ලෙස ඉහළ අධිකරණයේ පුරප්පාඩු හයක් ළඟදීම පිරවීමට නියමිත බව වාර්තා වේ.

සෝභිත රාජකරුණා, මේනකා විජේසුන්දර, මොහොමඩ් ලෆාර් සහ සම්පත් බී අබේකෝන් යන විනිසුරුවරුන් අභියාචනාධිකරණයේ ජ්‍යෙෂ්ඨතම විනිසුරුවරුන් වේ.

අභියාචනාධිකරණය, නීතිපති දෙපාර්තමේන්තුව සහ නිල නොවන නීතිඥ මණ්ඩලයේ නම් සළකා බලා ශ්‍රේෂ්ඨාධිකරණයේ පුරප්පාඩු පිරවීමට නියමිත බව වාර්තා වේ.

මීට පෙර වත්මන් අධිකරණ අමාත්‍යාංශයේ ලේකම් අයේෂා ජිනසේන සොලිසිටර් ජනරාල්වරිය ලෙස කටයුතු කරමින් සිටියදී නීතිපතිවරයා විසින් මේ සඳහා නිර්දේශ කර තිබිණි.

කෙසේවෙතත්, ශ්‍රේෂ්ඨාධිකරණය විසින් ශ්‍රේෂ්ඨාධිකරණයේ පුරප්පාඩු පිරවීම සම්බන්ධයෙන් එවක ජනාධිපතිවරයාට අතුරු නියෝගයක් නිකුත් කර තිබූ බැවින් එම නම සළකා බැලීමට නොහැකි විය.

මහාධිකරණ විනිසුරුවරුන් වන සරත් දිසානායක සහ ප්‍රදීප් හෙට්ටිආරච්චි මේ වන විට මහාධිකරණවල සිටින ජ්‍යෙෂ්ඨතම විනිසුරුවරුන් වේ.

අභියාචනාධිකරණයේ පුරප්පාඩුව සඳහා ජ්‍යෙෂ්ඨ නියෝජ්‍ය සොලිසිටර් ජනරාල් ලක්මාලි කරුණානායකගේ නමද නීතිපතිවරයා විසින් නිර්දේශ කර ඇත.

ශ්‍රේෂ්ඨාධිකරණයේ පුරප්පාඩුව මුලින්ම ඇති වූයේ විනිසුරු බුවනෙක අලුවිහාරේ පසුගිය වසරේ නොවැම්බර් මාසයේදී විශ්‍රාම ගැනීමෙන් පසුවය.

ඉන් අනතුරුව ප්‍රියන්ත ජයවර්ධන (මාර්තු), විජිත් මලල්ගොඩ (අගෝස්තු) සහ අගවිනිසුරු ජයන්ත ජයසූරිය (දෙසැම්බර්) යන විනිසුරුවරු විශ්‍රාම ගියහ.