වනජීවී අමාත්‍යාංශය තුළ අලි වැට සංරක්ෂණ කටයුතු සඳහා බහු කාර්ය සංවර්ධන නිලධාරීන් 4500ක් යෙදවීමට මුදල් අමාත්‍යාංශය අනුමැතිය ලබාදී ඇත.

වනජීවී හා වන සම්පත් සංරක්ෂණ ඇමැති පවිත්‍රාදේවි වන්නිආරච්චි පැවසුවේ, ඒ සඳහා නව සේවකයන් බඳවා නොගන්නා බවයි.

අනුමත බහුකාර්ය සංවර්ධන නිලධාරීන් දැනටමත් අලි වැට සංරක්ෂණ කටයුතුවල නිරතව සිටින බවද ඇය වැඩිදුරටත් පැවසුවාය.

රටේ වන ආවරණය මුළු භූමි ප්‍රමාණයෙන් 32% දක්වා වැඩිකිරීමේ ව්‍යාපෘතියේ කොටසක්වන වන මායිම් නිර්ණය කිරීමේ කටයුතු මේ වසරේ අවසන් කිරීමට අපේක්ෂා කරන බව ද ඇමැතිවරිය අනාවරණය කළේය.

ජනාධිපති මාධ්‍ය අංශයට අනුව, අද (මාර්තු 11) ජනාධිපති මාධ්‍ය මධ්‍යස්ථානයේ පැවති ප්‍රවෘත්ති සාකච්ඡාවකදී ඇමැතිවරිය මෙම අදහස් පළ කළාය.

එහිදී වැඩිදුරටත් අදහස් දැක්වූ ඇමැතිවරිය මෙසේ ද පැවැසුවාය.

“ජාත්‍යන්තර වනාන්තර දිනය මාර්තු මස 21 වනදාට යෙදී තිබෙනවා. ඊට සමගාමීව දිවයින පුරා සිටින සියලූම නිවාස වෙත එක් පැලයක් බැගින් ලබාදීමට කටයුතු කරනවා. ඒ සඳහා වන ව්‍යාප්ති නිලධාරීන් යෙදවීමට අප කටයුතු කරනවා. ජල පෝෂක කලාප ආරක්ෂා කරමින් වන ගහණය වර්ධනය කිරීම සඳහා වැඩපිළිවෙලක් මේ වන විටත් යොදා තිබෙනවා. රත්නපුර දිස්ත්‍රික්කයෙන් ආරම්භ කෙරෙන මෙම වැඩපිළිවෙල දිවයින පුරා ක්‍රියාත්මක කිරීමට බලාපොරොත්තු වනවා.

එමෙන්ම මෙරට වන ගහණය මුළු භූමි ප්‍රමාණයෙන් 32%ක් දක්වා වර්ධනය කිරීමේ ව්‍යාපෘතියට අදාළව වනාන්තරවල සීමා මායිම් සලකුණු කිරීම මෙම වසරේ අවසන් කිරීමට බලාපොරොත්තු වෙනවා. එය අප අමාත්‍යාංශයට අයත් වන සංරක්ෂණ දෙපාර්තමේන්තුව සතු කටයුත්තක්.

ඒ වගේම උමාඔය පළමු වන අදියර සාර්ථක ලෙස අවසන් කර තිබෙනවා. එමඟින් ඉඩම් අක්කර 20,000කට අලුතින් ජලය ලබාදීමට කටයුතු කර තිබෙනවා. MCM 45ක පානීය ජලය පහල උමාඔය ප්‍රදේශයට ලබාදීමටත්, මෙගාවොට් 120ක ජල විදුලිය ලබා ගැනීම සඳහා පරීක්ෂණ මට්ටමේ පෙරහුරුව සිදුකරමින් පවතිනවා. ඉන් මෙගා වොට් 120ක ජල විදුලි නිෂ්පාදනයක් ජාතික පද්ධතියට එකතු කිරීමට ද නියමිතයි.

තවද මිනිපේ අමුණ මඟින් යල-මහ කන්න ගොවිතැන් කිරීම සඳහා හෙක්ටයාර් 7,500කට වාරි පහසුකම් ලැබී තිබෙනවා. ඒ සඳහා මිනිපේ අමුණ මීටර් 3.5ක් සංවර්ධනය කර කිලෝ මීටර් 74ක් දක්වා වතුර ගෙන යාමට අවශ්‍ය ඇල මාර්ගය සම්පූර්ණයෙන්ම සකස් කර තිබෙනවා. පවුල් 15,500ක් එමඟින් ප්‍රතිලාභ ලබනවා.

එමෙන්ම වයඹ ඇල මාර්ගය මඟින් වෑ මැඩිල්ල ජලාශයේ සිට කිලෝමීටර් 90ක් වයඹ දිශාවේ ඇති කුඩා වැව් 350ක්, සහ මධ්‍යම ප්‍රමාණයේ වැව් 07ක්, සඳහා ජලය ලබාදීමටත් කටයුතු කර කෙරෙනවා. එම ඇල මාර්ගය අතරමැද කිලෝමීටර් දෙකක උමං මාර්ගයක් ඉදිකිරීමට ද නියමිත අතර ප්‍රධාන වැව් දෙකක් ද ප්‍රතිසංස්කරණය කිරීමට තිබෙනවා. මෙම ව්‍යාපෘතිය මඟින් පවුල් 75,000ක් සඳහා සුරක්ෂිත වාරි ජලය සහ පානීය ජලය MCM 10ක් ලබාදීමට හැකි වනවා.

ඒ වගේම උතුරු මැද පළාතට වාරි ජලය රැගෙන යාම සඳහා මොරගහකන්ද ජලාශයෙන් හුරුලු වැව සහ මහකනදරාව දක්වා කිලෝ මීටර් 96ක ඇළ මාර්ගයක් ඉදිකෙරෙමින් පවතිනවා. එය කිලෝමීටර් 28කින් යුත් උමං මාර්ගයකින් ද සමන්විතයි. ඉන් හෙක්ටයාර් 2,300ක් සහ පවුල් 175,000ක් සඳහා සුරක්ෂිත ජල පහසුකම සහ පානීය ජලය MCM 40ක් ලබාදීමට ද නියමිතයි. කුඩා වැව් 1,300ක් සදහා ජලය ගෙන යාමට ද හැකියි.

තවද අලිවැට සංරක්ෂණය සඳහා බහුකාර්ය සංවර්ධන නිලධාරීන් 4,500ක් වනජීවි අමාත්‍යාංශයට අනුයුක්ත කර ගැනීම සඳහා මුදල් අමාත්‍යාංශයේ අනුමැතිය හිමි වී තිබෙනවා. ඒ සඳහා නව සේවකයින් බඳවා ගැනීමක් සිදු කෙරෙන්නේ නැහැ. අමාත්‍යාංශයට අනුයුක්ත කර ගැනීම සඳහා අනුමැතිය හිමි වී ඇති බහුකාර්ය සංවර්ධන නිලධාරීන් දැනටමත් අලි වැට සංරක්ෂණය සඳහා කටයුතු කරමින් සිටින බව ද පැවසිය යුතුයි.”