තරුණයකු මරණයට පත්කිරීමේ අරමුණින් 1989 වසරේදී සුදු වෑන් රථයක් භාවිත කරමින් පැහැරගෙන යෑමේ චෝදනාවට වරදකරුවන් කරමින් ගම්පහ මහාධිකරණය විසින් හිටපු ජ්‍යෙෂ්ඨ පොලිස් අධිකාරි ජෝශප් ඩග්ලස් පීරිස් ඇතුළු පොලිස් නිලධාරීන් සිවුදෙනකුට නියම කොට තිබූ වසර පහ බැගින් වූ සිර දඬුවම් ස්ථිර කළ අභියාචනාධිකරණය ඔවුන්ගේ සිරදඬුවම් වහාම ක්‍රියාත්මක කිරීමට ඊයේ (25දා) නියෝග කළේය.

එම නඩුවේ පස්වන විත්තිකාර රංජිත් ජයසේකර නමැති නිලධාරියා නිදොස් කොට නිදහස් කිරීමට ද මේනකා විජේසුන්දර හා විකුම් කළුආරච්චි යන විනිසුරු මඬුල්ල නියෝග කළේය.

1989.01.01 වැනිදා නිල ඇඳුමින් සැරසී දෙල්ගොඩ ප්‍රදේශයේදී රත්න චන්ද්‍ර ලියනගේ නමැත්තා මරණයට පත්කිරීමේ අරමුණින් පැහැරගෙන යෑම ඇතුළු අධිචෝදනා හතක් යටතේ නීතිපතිවරයා විසින් එම විත්තිකරුවන්ට වසර පහ බැගින් සිරදඬුවම් 2009.08.26 වැනිදා නියම කොට තිබිණි.

එකී දඬුවමට එරෙහිව ගොනුකර තිබූ අභියාචනා පෙත්සම් සම්බන්ධයෙන් තීන්දුව ඊයේ නිකුත් කරමින් විනිසුරු මඬුල්ල පෙන්වා දුන්නේ 1, 2, 3, 4 යන විත්තිකාර පොලිස් නිලධාරීන් හතරදෙනාට ලබාදී තිබූ තීන්දුව නීතියට අනුකූල බවය.

අතිරේක සොලිසිටර් ජනරාල් ජනාධිපති නීතිඥ රොහන්ත අබේසූරිය නීතිපතිවරයා වෙනුවෙන් පෙනීසිටියේය.(දිවයින)